پرەزيدەنت جەتىسۋ وڭىرىندەگى ءىرى سەمەنت زاۋىتىنىڭ جۇمىسىمەن تانىستى
مەملەكەت باسشىسى قاسىم-جومارت توقايەۆ جەتىسۋ وڭىرىندەگى ءىرى ءوندىرىس وشاقتارىنىڭ ءبىرى سانالاتىن «ALACEM» سەمەنت زاۋىتىن ارالاپ كوردى، دەپ حابارلايدى Kazinform.
2020-جىلى يندۋستريالاندىرۋ باعدارلاماسى اياسىندا ىسكە قوسىلعان قازاقستان-سينگاپۋر بىرلەسكەن كاسىپورنىندا قۇرعاق ادىسپەن جىلىنا 1,5 ميلليون توننا سەمەنت وندىرىلەدى. جوبا قۇنى - 47 ميلليارد تەڭگە. زاۋىتتا، نەگىزىنەن، ازاماتتىق جانە وندىرىستىك نىساندار قۇرىلىسىندا كەڭىنەن پايدالانىلاتىن M400 ،M450، 500M ماركالى سەمەنت تۇرلەرى شىعارىلادى. مىسالى، ۇلكەن الماتى وزەنىنە سالىنعان «ايۋساي» بوگەتىنىڭ قۇرىلىسىنا وسى زاۋىتتىڭ ءونىمى قولدانىلعان.
كاسىپورىننىڭ باسقارۋشى ديرەكتورى ستانيسلاۆ شەرباكوۆتىڭ ايتۋىنشا، زاۋىت الماتى قالاسىنىڭ، جەتىسۋ جانە الماتى وبلىستارىنىڭ سەمەنت ونىمىنە دەگەن سۇرانىسىن 65 پايىزعا دەيىن قامتاماسىز ەتەدى. جوبانى جۇزەگە اسىرۋ بارىسىندا ەكولوگيالىق تازا، قالدىقسىز ءوندىرىس ستاندارتتارىنا ساي كەلەتىن وزىق تەحنولوگيالار قولدانىلعان. سونداي-اق ءونىم پروتسەسىن باسقارۋ ءۇشىن DCS ينتەللەكتۋالدى جۇيەسى ەنگىزىلگەن.
كاسىپورىننىڭ ءوندىرىس جانە كولىك-لوگيستيكالىق ۋچاسكەلەرىندە 600 ادام جۇمىس ىستەيدى. ولاردىڭ باسىم بولىگى - جەرگىلىكتى تۇرعىندار. سونىمەن قاتار ءونىمدى وتكىزۋ، ديلەرلىك جەلىلەر ارقىلى قوسىمشا 200 گە جۋىق جۇمىس ورنى اشىلدى.
كومپانيا زاۋىتتى ىسكە قوسقالى بەرى بيزنەستىڭ الەۋمەتتىك جاۋاپكەرشىلىگى اياسىندا كەربۇلاق اۋدانىنىڭ دامۋىنا 2,7 ميلليارد تەڭگە قارجىلاي قولداۋ كورسەتكەن. بۇل قاراجات سارىوزەك - كوكتال جولىن جوندەۋگە جانە اۋدانداعى الەۋمەتتىك جوبالارعا جۇمسالدى.
مەملەكەت باسشىسى زاۋىت جۇمىسشىلارىمەن اڭگىمەلەسىپ، وسىنداي ءىرى ءوندىرىستىڭ اشىلۋى قۇرىلىس يندۋسترياسىن دامىتۋ، اسىرەسە، جەرگىلىكتى ينفراقۇرىلىمدى جەتىلدىرۋ ءۇشىن ماڭىزدى ەكەنىن اتاپ ءوتتى.
بۇعان قوسا كومپانيا قۇرىلتايشىلارى ەلىمىزدە جۇزەگە اسىرىلىپ جاتقان ينۆەستيتسيالىق جوبالاردىڭ اۋقىمىن كەڭەيتىپ جاتىر. اتاپ ايتقاندا، 2021-جىلى اباي وبلىسىنىڭ جارما اۋدانىنداعى «قازاق سەمەنت» كاسىپورنىن ساتىپ الىپ، مودەرنيزاتسيا جاساۋ ارقىلى 450 جۇمىس ورنىن اشقان. سونىمەن قاتار تاياۋ جىلدارى جامبىل وبلىسى قورداي اۋدانىندا تاعى ءبىر سەمەنت ءوندىرۋ زاۋىتى ىسكە قوسىلماق. زاۋىت ءونىمى كورشىلەس قىرعىزستان مەن وزبەكستان مەملەكەتتەرىنە ەكسپورتتالادى.
