پرەزيدەنت جەتىسۋ وبلىسىنىڭ تۋريستىك الەۋەتىمەن تانىستى
مەملەكەت باسشىسىنا شوقان ءۋاليحانوۆ اتىنداعى «التىنەمەل» مەموريالدىق مۋزەيىندە جەتىسۋ وبلىسىنىڭ تۋريزم سالاسىن دامىتۋ ءۇشىن اتقارىلىپ جاتقان جۇمىستار جونىندە قىسقاشا مالىمەت بەرىلدى، دەپ حابارلايدى Kazinform.
وبلىس اكىمىنىڭ ورىنباسارى رۋستام ءاليدىڭ ايتۋىنشا، تۋريزم سالاسىنىڭ دامۋىنا قاتىستى نەگىزگى كورسەتكىشتەردە ءوسىم بايقالادى. سوڭعى ءۇش جىلدا وڭىرگە كەلگەن تۋريستەر سانى ەكى ەسە ارتقان. ال وسى سالاداعى كورسەتىلەتىن قىزمەتتەر كولەمى 16 ميلليارد تەڭگەگە دەيىن ءوستى.
اتالعان باعىتتىڭ دامۋىنا تىڭ سەرپىن بەرۋ ءۇشىن ءبىرقاتار ينفراقۇرىلىمدىق جوبا جۇزەگە اسىرىلىپ جاتىر.
اتاپ ايتقاندا، قازىر الاكولگە كولىكتىڭ بىرنەشە تۇرىمەن جەتۋگە بولادى. بىلتىر ءۇشارال اۋەجايىنىڭ ۇشۋ- قونۋ جولاعىنا رەكونسترۋكتسيا جاسالىپ، تۇراقتى اۋە قاتىناسى جولعا قويىلدى. بيىل «استانا - دوستىق» باعىتى بويىنشا «تالگو» پويىزى ىسكە قوسىلدى جانە «ءۇشارال - دوستىق» اۆتوجولىنىڭ رەكونسترۋكتسياسى اياقتالدى. قازىرگى كەزدە «تالدىقورعان - قالباتاۋ - وسكەمەن» اۆتوجولىن قايتا جوندەۋ، الاكول كۋرورتتىق ايماعىندا جوعارى ۆولتتى ەلەكتر جەلىلەرىن تارتۋ جۇمىستارى جۇرگىزىلىپ جاتىر.
بۇعان قوسا «بالقاش» تۋريستىك-رەكرەاتسيالىق ايماعىنىڭ باس جوسپارى» ازىرلەندى. ونىڭ اياسىندا ۇزىندىعى 16 شاقىرىم بولاتىن جاعالاۋعا بيۋدجەت ەسەبىنەن ينجەنەرلىك- كوممۋنيكاتسيالىق جەلى تارتىلىپ، جالپى اۋماعى 860 گەكتار جەرگە 7 باعىتتاعى دەمالىس ايماقتارى ورنالاستىرىلادى. جوسپار شەڭبەرىندە 30 ميلليارد تەڭگەگە دەيىن جەكە ينۆەستيتسيا تارتۋ كوزدەلگەن. سونىمەن قاتار كەلەسى جىلى كولگە اپاراتىن «الماتى - وسكەمەن - لەپسى - اقتوعاي» جولىنىڭ رەكونسترۋكتسياسىن اياقتاۋ جوسپارلانىپ وتىر.
«التىن-ەمەل»، «جوڭعار الاتاۋى» ۇلتتىق تابيعي پاركتەرىندە ەكولوگيالىق تۋريزمگە باسىمدىق بەرىلەدى. بيىل «Altynemel» ۆيزيت-ورتالىعى اشىلدى. ال «جوڭعار الاتاۋى» ۇلتتىق پاركىنىڭ اۋماعىندا جالپى قۇنى 1,7 ميلليارد تەڭگە بولاتىن 8 ينۆەستيتسيالىق جوبا جۇزەگە اسىرىلماق.
سونىمەن قاتار تەكەلى ماڭايىندا شاڭعى- بياتلون كەشەنىن سالۋ جانە بۇرقانبۇلاق سارقىراماسىنا دەيىنگى جولدى جوندەۋ جۇمىستارى جوسپارلانعان.
مەملەكەت باسشىسى تۋريستىك- دەمالىس ايماقتارىنا ينجەنەرلىك-كوممۋنيكاتسيالىق جەلى جۇرگىزۋمەن جانە اباتتاندىرۋمەن بەلسەندى تۇردە اينالىسىپ، وبلىستىڭ تۋريستىك الەۋەتىن ارتتىرۋ قاجەت ەكەنىن ايتتى.
- جالپى، وبلىستا تۋريستىك نىساندار جەتكىلىكتى. سوندىقتان ونىڭ بارىنە ءتيىستى دەڭگەيدە ءمان بەرىپ، دامىتۋ كەرەك. تۋريزم جەتىسۋ وبلىسى ەكونوميكاسىنىڭ باسىم باعىتى بولۋعا ءتيىس. تۋريستەر نەعۇرلىم كوبىرەك كەلسە، وبلىسقا دا وڭ سەپتىگىن تيگىزەدى. جەتىسۋ ءوڭىرىنىڭ تابيعاتى كەرەمەت. وبلىستىڭ تۋريزم سالاسىنداعى الەۋەتى وتە زور، - دەدى پرەزيدەنت.
