پرەزيدەنت: جازۋشىلار وداعى - رۋحانياتىمىزدىڭ التىن دىڭگەگى
استانا. KAZINFORM - الماتىدا قازاقستان جازۋشىلار وداعىنىڭ 90 جىلدىق مەرەيتويىنا ارنالعان سالتاناتتى شارا ءوتتى، دەپ حابارلايدى اقوردانىڭ باسپا ءسوز قىزمەتى.
وعان قازاقستان رەسپۋبليكاسىنىڭ مەملەكەتتىك كەڭەسشىسى ەرلان قارين، مادەنيەت جانە اقپارات ءمينيسترى ايدا بالايەۆا، تۇركسوي حالىقارالىق ۇيىمىنىڭ باس حاتشىسى سۇلتان رايەۆ، ەۋرازيا جازۋشىلار وداعىنىڭ پرەزيدەنتى ۋفۋك تۋزمان قاتىستى.
مەملەكەتتىك كەڭەسشى ەرلان قارين قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ وداقتىڭ 90 جىلدىعىنا وراي جولداعان قۇتتىقتاۋ حاتىن وقىپ بەردى.
مەملەكەت باسشىسىنىڭ حاتىندا: - جازۋشىلار وداعى - رۋحانياتىمىزدىڭ التىن دىڭگەگى. بۇل ۇيىم قالامگەرلەرىمىزدىڭ كاسىبي قاۋىمداستىعى رەتىندە ءتول ادەبيەتىمىز بەن مادەنيەتىمىزدى وركەندەتۋگە جانە ونى الەمگە تانىتۋعا زور ىقپال ەتەدى. ءسوز ونەرىنىڭ قاراشاڭىراعىن ۇلتتىق بىرەگەيلىگىمىزدىڭ بەرىك تۇعىرى دەۋگە بولادى. اقىن-جازۋشىلارىمىز ۇلتتى ۇيىستىرۋ جولىندا قالتقىسىز قىزمەت ەتىپ ءجۇر. اعا بۋىن نەگىزىن قالاعان وسى ۇلاعاتتى ءداستۇر ۇزدىكسىز جالعاسىپ كەلەدى. ادەبيەت - ويىمىزدىڭ تەرەڭدىگى مەن رۋحىمىزدىڭ اسقاقتىعىن ايعاقتايتىن ۇلى قازىنا. ونى زامان تالابىنا ساي دامىتۋ - قالامگەر قاۋىمنىڭ عانا ەمەس، مەملەكەتىمىزدىڭ الدىندا تۇرعان ماڭىزدى مىندەتتىڭ ءبىرى. ءقازىر ءبىز ۇلتتىڭ جاڭا ساپاسىن قالىپتاستىرىپ جاتىرمىز. وزىق ويلى ۇرپاق تاربيەلەۋ ىسىندە زيالى قاۋىم ايرىقشا ءرول اتقارۋى كەرەك. وسى جاۋاپكەرشىلىكتى تەرەڭ سەزىنىپ، ادامگەرشىلىك قۇندىلىقتاردى كەڭىنەن دارىپتەپ جۇرگەن بارشا قالامگەرلەرگە شىنايى ريزاشىلىعىمدى بىلدىرەمىن، - دەپ ايتىلعان.
سودان سوڭ قىرعىز رەسپۋبليكاسى پرەزيدەنتىنىڭ كەڭەسشىسى ارسلان قويشيەۆ قىرعىز رەسپۋبليكاسىنىڭ پرەزيدەنتى سادىر جاپاروۆتىڭ قۇتتىقتاۋىن وقىدى.
مەملەكەتتىك كەڭەسشى باسقوسۋ بارىسىندا ءسوز سويلەپ، ۇلت رۋحانياتىنىڭ قارا شاڭىراعى جونىندەگى وي-پىكىرىن ورتاعا سالدى. ادەبيەتتىڭ اعارتۋ ىسىندەگى رولىنە توقتالىپ، ادامگەرشىلىك قۇندىلىقتاردى دارىپتەيتىن شىعارمالاردىڭ ۇلت ساپاسىن ارتتىرۋعا ىقپالى وتە زور ەكەنىن اتاپ ءوتتى.
سونىمەن قاتار ەرلان قارين مەملەكەتتىڭ ادەبيەتتى دامىتۋ ىسىنە جانە ادەبي ورتانىڭ جالپى احۋالىنا باسا ءمان بەرەتىنىن ايتتى. پرەزيدەنتتىڭ قالامگەرلەرگە دەگەن ىقىلاسى مەن قۇرمەتىنىڭ ايرىقشا ەكەنىنە نازار اۋداردى. قاسىم-جومارت توقايەۆ مەملەكەتتىڭ باسشىسى عانا ەمەس، جازۋشىنىڭ پەرزەنتى رەتىندە دە تول ادەبيەتىمىزگە بەي-جاي قارامايتىنىن جەتكىزدى.
سالتاناتتى شاراعا تۇركيا، رەسەي، قىتاي، ازەربايجان، وزبەكستان، قىرعىزستان، تاتارستان، باشقۇرتستان، ياكۋتيا، چۋۆاشيا جانە باسقا دا الىس-جاقىن شەتەلدەن جانە ەلىمىزدىڭ تۇكپىر-تۇكپىرىنەن كەلگەن اقىن-جازۋشىلار مەن قوعامدىق ۇيىمداردىڭ وكىلدەرى قاتىستى.
جيىن سوڭىندا مەملەكەتتىك كەڭەسشى ۇلت مۇددەسى جولىندا ەڭبەك ەتىپ جۇرگەن بارشا قالامگەرگە العىس ءبىلدىردى.
