پرەزيدەنت جانىنداعى جاساندى ينتەللەكت جونىندە كەڭەستىڭ قۇرامىندا كىمدەر بولادى
الماتى. KAZINFORM - الماتىدا ءوتىپ جاتقان جاساندى ينتەللەكت جايىندا AlmatyFair.ai كورمەسىنە سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ قاتىستى.
ۆەدومستۆو باسشىسى ءىس-شارا بارىسىندا جاساندى ينتەللەكت جونىندە كەڭەستىڭ قۇرامىنا كىرەتىن ساراپشىلاردى اتاپ ءوتتى.
- پرەزيدەنت جانىنداعى جاساندى ينتەللەكت جونىندەگى كەڭەس قازىر بەلسەندى تۇردە قۇرىلىپ جاتىر. ءتيىستى نورماتيۆتىك قۇجاتتار ازىرلەنىپ، پرەزيدەنت اكىمشىلىگىمەن كەلىسۋ جۇرگىزىپ جاتىرمىز، سونداي-اق وسى كەڭەستىڭ قۇرامىنا قوسىلاتىن ساراپشىلار قوعامى ىرىكتەلىپ جاتىر،- دەدى ول.
سونداي-اق جاسلان ماديەۆ ج ي جونىندەگى كەڭەسكە قوسىلۋعا كەلىسىم بەرگەن حالىقارالىق ساراپشىلاردى اتادى. ولاردىڭ قاتارىندا جاساندى ينتەللەكت سالاسىنداعى الەمدەگى جەتەكشى مامانداردىڭ ءبىرى لي كايفۋ، بۇرىن Google-دا زەرتتەۋ توبىن باسقارعان پيتەر نورۆيگ، جاپونياداعى ج ي سالاسىنداعى تانىمال ساراپشى دجەيتي «دجوي» يتو بار.
ەسكە سالايىق، بۇعان دەيىن مەملەكەت باسشىسى سيفرلاندىرۋ مەن جاساندى ينتەللەكتىنى بارلىق سالاعا ەنگىزۋ كەرەك ەكەنىن ايتقان ەدى.
اۆتور
دوسبول اتاجان
