پرەزيدەنت: جاڭا جىل - ماڭىزدى مەجە، ءاز-ناۋرىزدى دا ەستەن شىعارماعان ءجون
جاڭا جىل - كۇنتىزبەنىڭ جاڭا پاراعىن اشاتىن ماڭىزدى مەجە، الايدا ءاز-ناۋرىزدى دا ەستەن شىعارماعان ءجون.
بۇل تۋرالى مەملەكەت باسشىسى قاسىم-جومارت توقايەۆ Egemen Qazaqstan گازەتىنە بەرگەن سۇحباتىندا ايتتى، دەپ حابارلايدى Kazinform.
«جاڭا جىل - ارينە، كۇنتىزبەنىڭ جاڭا پاراعىن اشاتىن ماڭىزدى مەجە. وسى ساتتە وتكەن جىلدى قورىتىندىلاپ، كەلەشەككە جوسپار قۇرۋ ادەتكە اينالعان. ءبىر جاعىنان، جاڭا جىل مەن ءۇشىن قاستەرلى مەرەكە ەمەس. ونىڭ ۇستىنە، ءوزىمىزدىڭ ءتول جاڭا جىلىمىز - ءاز-ناۋرىزدى ەستەن شىعارماعان ءجون. بۇل مەيرام - تىرشىلىكتى تۇلەتە كەلەتىن ناعىز تابيعي جىل باسى»، - دەدى پرەزيدەنت.
مەملەكەت باسشىسى ناۋرىز - جاڭارۋ مەن جاڭعىرۋدىڭ سيمۆولى ەكەنىن، سوندىقتان ءتول مەرەكەمىزدىڭ مازمۇنىن بايىتىپ، ونى بارىنشا ەرەكشەلەپ، جاڭاشا اتاپ ءوتۋىمىز كەرەگىن ايتتى.
«بۇل قادام قوعامدى ۇيىستىرىپ، ۇلتتىق بىرەگەيلىگىمىزدى ايشىقتاپ، ەل بىرلىگىن نىعايتا تۇسۋگە ىقپال ەتەدى دەپ سەنەمىن. ءسوز سوڭىندا بارشا حالقىمىزعا باق-بەرەكە تىلەيمىن! ەڭ باستىسى، ەلىمىز امان، جۇرتىمىز تىنىش بولسىن! قاستەرلى قازاقستانىمىز ءوسىپ-وركەندەي بەرسىن!»، - دەدى قاسىم-جومارت توقايەۆ.
