پرەزيدەنت شەكارالىق ەلدى مەكەندەردىڭ احۋالى تۋرالى: ستراتەگيالىق ماڭىزى بار ماسەلە

- ءبىز 2022 -جىلى جاڭادان ءۇش وبلىس قۇرىپ، وسى وڭىرلەردىڭ دامۋىنا كۇشتى سەرپىن بەردىك. بۇل اقىرى دۇرىس شەشىم بولدى. الەۋمەتتىك-ەكونوميكالىق كورسەتكىشتەر ەداۋىر ارتتى، ايماقتارعا ينۆەستيتسيا كەلە باستادى. سونىڭ ارقاسىندا جەرگىلىكتى تۇرعىنداردىڭ تۇرمىس ساپاسى دا جاقسارا ءتۇستى. دەگەنمەن ۇكىمەت جاڭا وبلىستاردىڭ احۋالىن باقىلاۋدا ۇستاۋعا ءتيىس. ولارعا كومەكتەسۋ قاجەت. مەنىڭ تاپسىرماممەن اباي جانە شىعىس قازاقستان وبلىستارىندا شەكارا ماڭىنداعى بىرنەشە اۋدان قالپىنا كەلتىرىلدى. مۇنى جۇرت وتە جاقسى قابىلدادى، - دەدى قاسىم-جومارت توقايەۆ ۇلتتىق قۇرىلتايدا.

مەملەكەت باسشىسىنىڭ ايتۋىنشا، جاڭا اۋدانداردا تىرشىلىك جاندانىپ، ينفراقۇرىلىم جاقسارا باستادى.

- اۋىلدى دامىتۋ تۇجىرىمداماسىندا شەكارالىق اۋماقتارعا قاتىستى جۇمىستىڭ نەگىزگى باعدارى ايقىندالعان. شەتكەرى جاتقان ەلدى-مەكەندەردىڭ احۋالى ەل ىرگەسىنىڭ بەكەم بولۋىنا تىكەلەي اسەر ەتەدى. بۇل - ستراتەگيالىق ماڭىزى بار ماسەلە. سوندىقتان وسى باعىتتاعى جۇمىستى جۇيەلى تۇردە جالعاستىرۋ كەرەك، - دەيدى پرەزيدەنت.

بيىل ەكونوميكانىڭ ناقتى سەكتورىنا جۇمسالاتىن قارجى كولەمى، 8 تريلليون تەڭگەگە دەيىن جەتكىزىلەدى.

- ءبىز ۇلتتىق قۇرىلتايدىڭ وتىرىستارىندا ۇنەمى الەۋمەتتىك جانە مادەني-گۋمانيتارلىق ماسەلەلەرگە قاتىستى ماڭىزدى شەشىمدەر قابىلداپ قانا قويماي، ەل دامۋىنىڭ باسقا دا باعىتتارى بويىنشا باستى باسىمدىقتاردى ايقىندايمىز. ايماقتارداعى ەكونوميكانىڭ وركەندەۋىنە سەرپىن بەرەتىن جاڭا مۇمكىندىكتەرگە جول اشۋ جانە وڭىرلەردىڭ دامۋ دەڭگەيىندەگى تەڭسىزدىكتى جويۋ - قازىر مەملەكەت الدىندا تۇرعان نەگىزگى مىندەتتىڭ ءبىرى، - دەدى پرەزيدەنت.

مەملەكەت باسشىسىنىڭ اتاپ وتۋىنشە، بيىل ەكونوميكانىڭ ناقتى سەكتورىنا جۇمسالاتىن قارجى كولەمىن ەكى ەسەگە جۋىق كوبەيتىپ، 8 تريلليون تەڭگەگە دەيىن جەتكىزۋ جوسپارلانىپ وتىر.

- الداعى جىلدارى ۇكىمەت ناقتى سەكتورعا بولىنەتىن قارجى كولەمىن 10 تريلليون تەڭگەگە دەيىن جەتكىزۋگە ءتيىس. بۇل جەردە بيزنەستى قولداۋدىڭ ەلىمىزدە بۇرىن-سوڭدى بولماعان اۋقىمدى شارالارى تۋرالى ايتىلىپ وتىر، - دەدى قاسىم-جومارت توقايەۆ.

بۇعان دەيىن قاسىم-جومارت توقايەۆ ۇلتتىق قۇرىلتايدا قازاق حالقىن دانىشپان دەپ ايتساق، قاتەلەسپەيمىز دەگەن بولاتىن.

سونداي-اق پرەزيدەنت ەلىمىزدە اباي ينستيتۋتىن قۇرىپ، سەرىكتەس ەلدەردە ءتول مادەنيەتىمىزدى ناسيحاتتايتىن ورتالىققا اينالدىرۋدى تاپسىردى.

اۆتور

داۋلەت ىزتىلەۋ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى