پرەزيدەنت ش ى ۇ- عا مۇشە مەملەكەتتەردىڭ قاۋىپسىزدىك كەڭەستەرى حاتشىلارىمەن كەزدەستى
استانا. KAZINFORM - مەملەكەت باسشىسى قاسىم-جومارت توقايەۆ ش ى ۇ - عا مۇشە مەملەكەتتەردىڭ قاۋىپسىزدىك كەڭەستەرى حاتشىلارىمەن كەزدەستى. بۇل تۋرالى Akorda.kz حابارلادى.
قازاقستان پرەزيدەنتى قازىرگى ۋاقىتتا شاڭحاي ىنتىماقتاستىق ۇيىمىنىڭ استاناداعى سامميتىنە دايىندىق ءجۇرىپ جاتقانىن ايتىپ، اتالعان شارانىڭ ەلىمىز ءۇشىن ءمانى زور ەكەنىنە نازار اۋداردى.
پرەزيدەنت ش ى ۇ كەڭىستىگىندەگى ۇجىمدىق قاۋىپسىزدىكتىڭ ءرولى ارتىپ كەلە جاتقانىن ەسكەرە وتىرىپ، ۇيىمعا مۇشە ەلدەردىڭ قاۋىپسىزدىك كەڭەسى حاتشىلارىنىڭ كەزدەسۋلەرى ايرىقشا وزەكتى ەكەنىن اتاپ ءوتتى.
- وتكەن جىلى الەمدە وڭىرلىك جانە جەرگىلىكتى دەڭگەيدە 183 قاقتىعىس ورىن الدى. جانجالداردىڭ سانى شامامەن 30 پايىزعا ارتقان. بۇل - سوڭعى وتىز جىلداعى ەڭ جوعارى كورسەتكىش. ساراپشىلار قاقتىعىستار مەن زورلىق-زومبىلىق ارەكەتتەرىنىڭ جاھاندىق سيكلى بەلەڭ الىپ كەلە جاتىر دەپ سانايدى. وسى رەتتە حالىقارالىق تەرروريزمنەن دە تونەتىن قاۋىپ كۇشەيىپ كەلەدى، - دەدى قاسىم-جومارت توقايەۆ.
مەملەكەت باسشىسىنىڭ ايتۋىنشا، تاياۋدا كوپتەگەن بەيبىت تۇرعىننىڭ ءومىرىن جالماعان ماسكەۋ وبلىسىنداعى قايعىلى وقيعا لاڭكەستەردىڭ زورلىق-زومبىلىقتىڭ ەڭ قاتىگەز ءارى زۇلىم تاسىلدەرىن قولداناتىنىن كورسەتتى.
- قازاقستان لاڭكەستىك ارەكەتتى قاتاڭ ايىپتايتىنىن بىردەن مالىمدەدى جانە رەسەيمەن بىرگە ەكەنىن ءبىلدىردى. ەكى ەلدىڭ ارناۋلى قىزمەتتەرى تەرروريزمگە قارسى ءىس-قيمىل ماسەلەلەرى بويىنشا ۇدايى بايلانىستا. ماسكەۋ وبلىسىنداعى لاڭكەستىك ارەكەتتى بۇكىل الەم، سونىڭ ىشىندە بۇگىن وزدەرىڭىز وكىلى رەتىندە كەلىپ وتىرعان ەلدەر دە قاتاڭ ايىپتادى. ب ۇ ۇ قاۋىپسىزدىك كەڭەسى كىنالىلەردىڭ ءبارىن جاۋاپقا تارتۋ قاجەت ەكەنىن، سونداي- اق تەرروريزممەن كۇرەس ماسەلەسىندە حالىقارالىق ىنتىماقتاستىقتى دامىتۋدىڭ ماڭىزدىلىعىن اتاپ ءوتتى. ەڭ باستىسى، بولعان ىستەن دۇرىس قورىتىندى شىعارىپ، ناقتى شارالار قابىلداۋ كەرەك. ازاماتتارىمىزدىڭ قاۋىپسىزدىگىن قامتاماسىز ەتىپ، تەررورلىق قاۋىپ-قاتەرلەرگە لايىقتى توتەپ بەرۋگە ءتيىسپىز، - دەدى قازاقستان پرەزيدەنتى.
اۆتور
ابىلايحان جۇماشيەۆ
