دۇنيەجۇزىلىك بانك قازاقستاندا 5 ءىرى جوبانى جۇزەگە اسىرىپ جاتىر
استانا. KAZINFORM - مەملەكەت باسشىسى قاسىم-جومارت توقايەۆ دۇنيەجۇزىلىك بانك توبىنىڭ پرەزيدەنتى ادجاي بانگامەن كەزدەستى، دەپ حابارلايدى اقوردا.
قاسىم-جومارت توقايەۆ One Water سامميتى اياسىندا دۇنيەجۇزىلىك بانك توبىنىڭ پرەزيدەنتى ادجاي بانگامەن كەزدەستى.
مەملەكەت باسشىسى ەلىمىزدىڭ دۇنيەجۇزىلىك بانكپەن ستراتەگيالىق سەرىكتەستىگىنىڭ ءمانىن ەرەكشە اتاپ ءوتتى. پرەزيدەنتتىڭ ايتۋىنشا، بۇگىندە قارجى ينستيتۋتىمەن بىرلەسە سۋ رەسۋرستارى، كولىك جانە ءبىلىم بەرۋ سالالارىندا جالپى قۇنى 3,5 ميلليارد دوللار بولاتىن بەس ءىرى جوبا جۇزەگە اسىرىلىپ جاتىر.
مەملەكەت باسشىسى دۇنيەجۇزىلىك بانكتىڭ كولىك جولدارىنىڭ ورنىقتىلىعى مەن بايلانىسىن جەتىلدىرۋ باعدارلاماسى (TRACE) شەڭبەرىندە اتقارىلاتىن قازاقستاندىق جوباعا 650 ميلليون دوللار كولەمىندە قارجى ءبولۋ تۋرالى شەشىمىن قۇپتادى. بۇل رەتتە قاسىم-جومارت توقايەۆ ورتا ءدالىزدى دامىتۋعا، اتاپ ايتقاندا، جەزقازعان - قاراعاندى اۆتوماگيسترالىنىڭ قۇرىلىسىنا سالىناتىن ينۆەستيتسيانىڭ ستراتەگيالىق ماڭىزىنا نازار اۋداردى.
ادجاي بانگا دۇنيەجۇزىلىك بانكتىڭ قازاقستانمەن اراداعى ىقپالداستىق دەڭگەيىنە جوعارى باعا بەرىپ، ءوزارا ءتيىمدى سەرىكتەستىكتى نىعايتۋعا دايىن ەكەنىن راستادى. اتاپ ايتقاندا، بانك ەكونوميكانىڭ ءتۇرلى سالاسىندا بىرلەسكەن ءىرى جوبالاردى جۇزەگە اسىرۋعا مۇددەلى.
قاسىم-جومارت توقايەۆ ەكىجاقتى ديالوگتى جانداندىرىپ، بىرلەسكەن جۇمىستىڭ ۇزاقمەرزىمدى پەرسپەكتيۆاسىن ايقىنداۋ ءۇشىن ادجاي بانگانى قازاقستانعا ساپارمەن كەلۋگە شاقىردى.
ەسكە سالساق، بۇگىن مەملەكەت باسشىسى قاسىم-جومارت توقايەۆ One Water سامميتىنە قاتىسۋ ءۇشىن ساۋد ارابياسىنا جۇمىس ساپارىمەن باردى.
