پرەزيدەنت ۆاتيكان باسشىلىعىن الەمدىك ءدىن كوشباسشىلارىنىڭ كەزەكتى سەزىنە شاقىردى
ۆاتيكان. KAZINFORM - پرەزيدەنت قاسيەتتى تاقتىڭ مەملەكەتتەرمەن بايلانىس جونىندەگى حاتشىسى پول ريچارد گاللاحەرمەن كەزدەستى.
قاسيەتتى تاقتىڭ حاتشىسىمەن كەزدەسۋ بارىسىندا قاسىم-جومارت توقايەۆ ريم پاپاسى فرانتسيسكپەن وتە مازمۇندى ءارى ناتيجەلى جۇزدەسۋ بولعانىن اتاپ ءوتتى.
مەملەكەت باسشىسىنىڭ ايتۋىنشا، ۆاتيكاننىڭ دايەكتى قولداۋىنىڭ ارقاسىندا قازاقستان وتكىزىپ جاتقان الەمدىك جانە ءداستۇرلى دىندەر كوشباسشىلارىنىڭ سەزدەرى ءدىني قاۋىمدار اراسىندا ءوزارا تۇسىنىستىك پەن قۇرمەتتى نىعايتاتىن ماڭىزدى الاڭعا اينالدى.
پرەزيدەنت كاتوليك شىركەۋى باسشىسىنىڭ ەلىمىزگە جاساعان تاريحي ساپارىنىڭ بەيبىتشىلىكتى ناسيحاتتاۋ، بىرلىككە شاقىرۋ تۇرعىسىنان سيمۆولدىق ءمانى بولعانىن ەسكە سالىپ، بۇل ساپار تەك قازاقستانداعى كاتوليك قاۋىمىنىڭ عانا ەمەس، وڭىردەگى باسقا دا ءدىن وكىلدەرىنىڭ اراسىندا كەڭ قولداۋ تاپقانىن اتاپ ءوتتى.
سونىمەن قاتار مەملەكەت باسشىسى ەلىمىزدىڭ قاسيەتتى تاقپەن ءبىلىم، دەنساۋلىق ساقتاۋ جانە كليماتتىڭ وزگەرۋىنە قارسى كۇرەس سالالارى بويىنشا ءوزارا بايلانىستى نىعايتۋعا ايرىقشا ءمان بەرەتىنىن جەتكىزدى.
قاسىم-جومارت توقايەۆ قازاقستاندىق عالىمداردىڭ ۆاتيكان كىتاپحاناسى مەن اپوستول ارحيۆىندەگى تاريحي ماتەريالداردى تەگىن زەرتتەۋىنە مۇمكىندىك بەرگەنى ءۇشىن ارحيەپيسكوپ پول گاللاحەرگە ريزاشىلىعىن ءبىلدىردى.
سونداي- اق پرەزيدەنت انا مەن بالا ۇلتتىق عىلىمي ورتالىعى جانە ۆاتيكان Bambino Gesu پەدياتريا گوسپيتالى اراسىنداعى ىنتىماقتاستىقتى قۇپتادى.
قاسىم-جومارت توقايەۆ قازاقستاننىڭ بەيبىتشىلىكتى، ءوزارا قۇرمەتتى نىعايتۋ ءۇشىن ەتنوسارالىق جانە كونفەسسياارالىق كەلىسىمگە بەيىلدى ەكەنىن تاعى دا راستادى.
كەزدەسۋ سوڭىندا پرەزيدەنت قاسيەتتى تاقتىڭ باسشىلىعىن استاناداعى الەمدىك جانە ءداستۇرلى دىندەر كوشباسشىلارىنىڭ كەزەكتى سەزىنە قاتىسۋعا شاقىردى.
