گرۋزياداعى پرەزيدەنتتىك سايلاۋ: داۋىس بەرۋ قالاي ءوتىپ جاتىر

حابارلانعانداي، ەلدىڭ پوليتسيا بولىمشەلەرى داۋىس بەرۋ ءوتىپ جاتقان پارلامەنت عيماراتىنىڭ سىرتىندا كەزەكشىلىكتىڭ كۇشەيتىلگەن رەجيمىنە كوشتى. وسىلايشا، تاڭەرتەڭنەن باستاپ بارلىق قىزمەت كىرەبەرىسىنە پوليتسەيلەر قويىلدى. رۋستاۆەلي داڭعىلىنداعى پارلامەنت سارايىنىڭ جانىنداعى الاڭدى دا كوردوندار كۇزەتىپ وتىر.

پارلامەنتتىڭ وزىندە سارى قاۋىپسىزدىك دەڭگەيى ىسكە قوسىلعان. كەلۋشىلەر ءۇشىن كىرۋ شەكتەۋلى. تەك ءتيىستى قۇرىلىمدىق بولىمشەلەر شاقىرعان تۇلعالار عانا كىرگىزىلىپ جاتىر.

ازاتتىق الاڭىندا سۋ اتقىشتارى كەزەكشىلىك اتقارىپ ءجۇر. ارنايى جاساقتاردى تاسىمالداۋعا ارنالعان اۆتوبۋستار جاقىن جەردە تۇر.

ەرەۋىلشىلەر تاڭەرتەڭ ەرتە پارلامەنت الدىنا جينالا باستادى. تاڭ اتقاندا بىرنەشە جۇزدەگەن ستۋدەنت «ويان، گرۋزيا» ۇرانىمەن رۋستاۆەليگە دەيىن ءجۇردى.

ادامدار اۋا رايىنىڭ قاتتى سۋىعىنا قاراماستان ءالى دە جينالىپ جاتىر. نارازىلىق شارالارى كۇنى بويى جالعاسادى دەپ كۇتىلىپ وتىر.

ەسكە سالا كەتسەك، گرۋزيادا پرەزيدەنتتىك سايلاۋعا ارنالعان سايلاۋ ۋچاسكەلەرى جەرگىلىكتى ۋاقىت بويىنشا ساعات 09:00-دە (استانا ۋاقىتىمگەن 10:00) اشىلدى.

داۋىس بەرۋ پارلامەنت عيماراتىندا ساعات 14:00-گە دەيىن جالعاسادى. جاڭا مەملەكەت باسشىسىن 300 ادامنان تۇراتىن سايلاۋشىلار القاسى سايلايدى.

گرۋزيادا پرەزيدەنت 5 جىلدىق مەرزىمگە سايلانادى. بۇل لاۋازىمعا جالعىز ۇمىتكەر - بيلىكتەگى «گرۋزين ارمانى - دەموكراتيالىق گرۋزيا» پارتياسىنىڭ وكىلى، بۇرىنعى فۋتبولشى، پارلامەنت دەپۋتاتى ميحايل كاۆەلاشۆيلي.

گرۋزيانىڭ قازىرگى پرەزيدەنتى سالومە زۋرابيشۆيلي بۇل قىزمەتتى 2018 -جىلدىڭ 16-جەلتوقسانىنان بەرى اتقارىپ كەلەدى. بۇعان دەيىن ول پارلامەنت «زاڭسىز» بولعاندىقتان، مانداتىنىڭ اياقتالۋىنا قاراماستان وتستاۆكاعا كەتپەيتىنىن مالىمدەگەن.

زارينا تۋعانبايەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى