پەريزات قايراتتىڭ ءىسى 100 تومنان اسقان
استانا. KAZINFORM - قارجىلىق مونيتورينگ اگەنتتىگى ءتوراعاسىنىڭ ورىنباسارى جەڭىس ەلەمەسوۆ ءماجىلىس وتىرىسىنان كەيىن وتكەن باسپا ءسوز ءماسليحاتىندا پەريزات قايراتتىڭ ءىسى قانداي ساتىدا ەكەنىن ايتتى.
- بۇل ءىس بويىنشا قازىر اياقتاۋ ساتىسىندا تۇرمىز. جۋىق ارادا تەرگەۋ ماتەريالدارىمەن تانىسۋ ساتىسى باستالادى. تانىسۋ ساتىسى قانشاعا سوزىلاتىنىن مەن ايتا المايمىن. ويتكەنى بۇل پروتسەسكە قاتىسۋشىلارعا بايلانىستى. قىلمىستىق ءىستىڭ ماتەريالدارى ايعاق زاتتاردى قوسپاعاندا 100 تومنان اسادى. قازىر كۇدىكتى قاماۋدا وتىر. قاماۋ مەرزىمى ۇزارتىلعان، - دەدى ول.
سونداي-اق، ول اتالعان ءىس بويىنشا پەريزات قايراتتىڭ اناسى دا كۇدىكتى ەكەنىن اتاپ ءوتتى.
- بىرىنشىدەن، «الاياقتىق» بابى بويىنشا ايىپ تاعىلىپ وتىر. سونداي-اق، 218-باپ بويىنشا ءىس قوزعالعان. بۇل قىلمىستىق جولمەن الىنعان اقشانى زاڭداستىرۋ ماسەلەسى. بىرنەشە ەپيزود تەرگەلىپ جاتىر. بۇعان دەيىن ونىڭ پالەستيناداعى جاعدايعا بايلانىستى جانە تاسقىن كەزىندە قايىرىمدىلىق ماقساتقا جيناعان اقشالار بويىنشا ەپيزودتار تىركەلگەنىن رەليزدەردە مالىمدەگەن ەدىك. قاڭتاردىڭ اياعىندا قوسىمشا ەپيزودتى قوستىق. بۇل ەپيزود بويىنشا ول مۇگەدەكتىگى بار بالالارعا ارنالعان وڭالتۋ ورتالىعىن قۇرۋعا اقشا جيناعان. وسىلايشا 22 ميلليون تەڭگەدەي اقشا تارتقان. ول اقشانى دا جەكە قاجەتىنە جۇمساعان. بۇكىل ەپيزودتار بويىنشا جيناعان سومانى دوڭگەلەكتەگەندە پاتەر، جەر ءۇي، كولىكتەر ساتىپ العان. ونىڭ ءبارىن، مەكەنجايىن، كولىك ماركالارىن بۇعان دەيىن حابارلاعانبىز، - دەدى اگەنتتىك ءتوراعاسىنىڭ ورىنباسارى.
بۇعان دەيىن سوت پەريزات قايراتتىڭ دۇنيە-مۇلكىنە شەكتەۋ قويعانى حابارلاعان ەدى.
اۆتور
ەسىمجان ناقتىباي
