رەيس كەشىككەنى ءۇشىن وتەماقى الۋعا بولا ما؟
استانا. KAZINFORM - رەيس كەشىگۋى - كەز كەلگەن جولاۋشى تاپ بولۋى مۇمكىن جاعىمسىز جاعداي.
جولاۋشىلاردىڭ قۇقىقتارى قانداي؟
ازاماتتىق اۆياتسيا كوميتەتى مالىمەتىنشە، «قازاقستان رەسپۋبليكاسىنىڭ اۋە كەڭىستىگىن پايدالانۋ جانە اۆياتسيا قىزمەتى تۋرالى» زاڭنىڭ 86-بابىنا سايكەس رەيس كەشىگۋىنە اۋەكومپانيا كىنالى بولعان جاعدايدا اۋە كەمەسى كەش كەلۋىنە بايلانىستى تاسىمالداۋشى مىناعان مىندەتتى:
جولاۋشىلارعا ارالىق پۋنكتتەردە سالقىن سۋسىندار بەرۋ؛
كەشىككەن ۋاقىتىنا بايلانىستى ىستىق تاماقپەن قامتاماسىز ەتۋ؛
كەشىككەن ۋاقىتىنا قاراي قوناق ءۇي ۇيىمداستىرۋ؛
قاجەت بولعان جاعدايدا اۋەجايدان قوناق ۇيگە جانە كەرى ترانسفەر بەرۋ.
اقشالاي وتەماقى الۋعا بولا ما؟
زاڭعا سايكەس جولاۋشىلار اقشالاي وتەماقى الۋعا دا قۇقىلى.
«جولاۋشىنى مەجەلى جەرگە كەش جەتكىزگەنى ءۇشىن تاسىمالداۋشى ءار كەشىككەن ساعات ءۇشىن تاريف (كەشىككەن ۇشۋ ۋچاسكەسىنىڭ تاريفى) قۇنىنىڭ ءۇش پايىزىن ايىپپۇل رەتىندە تولەۋگە مىندەتتى. سونىمەن قاتار، جولاۋشى كەشىگۋىنە بايلانىستى شىعىنعا ۇشىراعان جاعدايدا دا وتەلۋى قاجەت. ايىپپۇلدىڭ جالپى سوماسى ساتىپ الىنعان تاريفتىڭ (ۇشۋ ۋچاسكەسىنىڭ تاريفىنىڭ) قۇنىنان اسپاۋعا ءتيىس» - دەپ ءتۇسىندىردى ا ا ك وكىلدەرى.
وتەماقىنى قالاي الۋعا بولادى؟
ەگەر رەيسىڭىز كەشىگىپ، ءتيىستى وتەماقى نەمەسە قىزمەتتەردى العىڭىز كەلسە:
اۋەكومپانيا وكىلدىگىنە جۇگىنىپ، قاجەت قىزمەتتەردى تالاپ ەتىڭىز.
بارلىق قۇجاتتى ساقتاڭىز: وتىرعىزۋ تالونى، بيلەت، قوسىمشا شىعىندارعا (تاماق، قوناق ءۇي) كەتكەن چەكتەر.
ەگەر تاسىمالداۋشى ءوز مىندەتىن ورىنداۋدان باس تارتسا، جازباشا شاعىم جىبەرىڭىز.
ەگەر شاعىم قاناعاتتاندىرىلماسا، ازاماتتىق اۆياتسيا كوميتەتىنە نەمەسە سوتقا جۇگىنۋگە بولادى.
«وسى باپتا كوزدەلگەن تالاپتاردى بۇزعان تاسىمالداۋشىلار قازاقستان زاڭناماسىنا سايكەس جاۋاپقا تارتىلادى» - دەدى ۆەدومستۆو وكىلدەرى.
