ريم پاپاسى فرانسيسك روجدەستۆو قارساڭىندا بارلىق قارۋلى قاقتىعىستاردى توقتاتۋعا ۇندەدى
استانا. KAZINFORM - ريم پاپاسى فرانسيسك جەكسەنبىلىك دۇعاسىندا ۋكراينا مەن گازا سەكتورىنداعى مەكتەپتەر مەن اۋرۋحانالاردى اياۋسىز بومبالاۋدى ايىپتاپ، بارلىق سوعىستارداعى اتىستى توقتاتۋعا شاقىردى.
بۇل تۋرالى گولوس امەريكي حابارلادى.
- قارۋ ءۇنى جويىلىپ، روجدەستۆو اندەرى باستالسىن! روجدەستۆو كۇنى ۋكراينادا، كيەلى جەردە، تاياۋ شىعىستا جانە بۇكىل الەمدە سوعىس توقتاسىن دەپ دۇعا ەتەيىك، - دەدى فرانسيسك جەكسەنبى كۇنى پونتيفيك.
فرانسيسك «مەكتەپتەرى، اۋرۋحانالارى مەن شىركەۋلەرى اياۋسىز قيراتىلىپ، ابدەن توزعان ۋكراينانى» ەسكە الدى.
سونداي-اق ول گازا تۋرالى ويلاعان كەزدە قانداي اۋىرتپالىق سەزىنەتىنىن ءبىلدىردى.
بالالاردى اۆتوماتپەن اتىپ، مەكتەپتەر مەن اۋرۋحانالاردى بومبالاۋ - قانداي قاتىگەزدىك، - دەدى ول.
جەكسەنبىلىك دۇعا جاساۋ ءراسىمى عيمارات ىشىندە ءوتتى. ۆاتيكان مۇنى سىرتتاعى سالقىن اۋا رايىمەن جانە فرانسيسك ءۇشىن الداعى اپتانىڭ تىعىزدىعىمەن بايلانىستىردى.
سەيسەنبى كۇنى 88 جاستاعى پونتيفيك ءوزى قاسيەتتى جىل دەپ جاريالاعان جىلدىڭ باستالۋىنا ارنالعان ءىس- شارالارعا، سونداي-اق اۋليە پەتر سوبورىنداعى روجدەستۆو كۇنىنە ارنالعان شارالارعا قاتىسادى. بەيسەنبى كۇنى ول قاسيەتتى جىلدى اشىپ برۋ ءۇشىن ريمنىڭ باس تۇرمەسىنە بارادى.
فرانسيسك اسىرەسە قىس ايلارىندا برونحيت سالدارىنان جاپا شەگەدى. 2023 -جىلى ول اۋرۋحاناعا ءتۇسىپ، ەم قابىلداعان. جاس كەزىندە ونىڭ وكپەسىنىڭ ءبىر بولىگىن الىپ تاستاعان، سول سەبەپتى اسىرەسە جاياۋ جۇرگەندە نەمەسە شارشاعان كەزدە ءجيى ەنتىگىپ قالادى.
