ەرەۋىلشىلەر يلون ماسكتان ا ق ش اكىمشىلىگىنەن كەتۋدى تالاپ ەتتى
استانا. قازاقپارات - ۆاشينگتوندا جۇزدەگەن ادام شەرۋگە شىعىپ، ميللياردەر يلون ماسكتان ا ق ش پرەزيدەتىنىڭ كەڭەسشىسى قىزمەتىنەن كەتۋدى تالاپ ەتتى. ەرەۋىلشىلەر اراسىندا دەموكراتيالىق پارتيا اتىنان سايلانعان سەناتورلار مەن كونگرەسمەندەر، زاڭگەرلەر مەن كيبەرقاۋىپسىزدىك ساراپشىلارى بار.
ولار كاپيتولي ماڭىنا جينالعان. شەرۋشىلەر يلون ماسك باسقاراتىن مەملەكەتتىك تيىمدىلىك دەپارتامەنتىنىڭ قارجى مينيسترلىگىنە قاراستى تولەم بازاسىنا كىرۋگە رۇقسات العانىنا قارسى. ولاردىڭ ايتۋىنشا، بۇل سالىق - تولەۋشىلەر مالىمەتتەرىنىڭ قۇپيالىلىق ەرەجەسىنە قايشى ارەكەت. بۇعان دەيىن ميللياردەر بۇل دەرەكتەر مەملەكەتتىك بيۋدجەتكە مونيتورينگ جۇرگىزىپ، ارتىق شىعىندى قىسقارتۋعا قاجەت دەپ مالىمدەگەن.
ال ا ق ش-تاعى 12 شتاتتىڭ باس پروكۋرورلارى يلون ماسك باسقاراتىن تيىمدىلىك دەپارتامەنتىنىڭ مەملەكەتتىك تولەم جۇيەسىنە كىرۋگە رۇقسات العانىنا قارسى شىعىپ، بۇل شەشىمنىڭ كۇشىن جويۋدى تالاپ ەتتى. ولاردىڭ ايتۋىنشا، بۇل ميلليونداعان سالىق تولەۋشى مالىمەتتەرىنىڭ قۇپيالىق شارتىن بۇزادى جانە پرەزيدەنتتىڭ ءوزى جەكە دەرەككە قول سۇعا المايدى. پرەزيدەنت كەڭەسشىسى بولىپ تاعايىندالعان يلون ماسك بۇل مالىمەتتەر مەملەكەتتىك قارجىنى باقىلاۋ جانە قىسقارتۋ ءۇشىن قاجەت دەگەن. ول ا ق ش ۇكىمەتىنىڭ شىعىنىن 2 تريلليون دوللارعا ازايتپاق نيەتتە.
24.kz
