ەريەۆان مەن باكۋ بىتىمگەرشىلىك كەلىسىم جوباسىنىڭ 17 بابىنىڭ 15-ءى بويىنشا كەلىستى
استانا. KAZINFORM - ارمەنيا ازەربايجانمەن قارىم-قاتىناستى تولىق قالىپقا كەلتىرۋگە باعىتتالعان كەلىسسوزدەرگە قاتىسۋدى جالعاستىرىپ جاتىر، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
ە ق ى ۇ مينيسترلەر كەڭەسىنىڭ 31- وتىرىسىندا ءسوز سويلەگەن ارمەنيا سىرتقى ىستەر ءمينيسترى ارارات ميرزويان ارمەنيا مەن ازەربايجان اراسىنداعى كەلىسسوز ماسەلەسىنە توقتالدى. ونىڭ ايتۋىنشا، وتكەن جىلداعى ەكىجاقتى كەلىسسوزدەر ارمەنيا مەن ازەربايجان اراسىنداعى شەكارانى دەليميتاتسيالاۋ جانە مەملەكەتارالىق شەكارانىڭ 12 شاقىرىمدىق ۋچاسكەسىن انىقتاۋ تۋرالى ەرەجەگە قول قويۋعا اكەلدى.
- ءبىز ەكى ەل اراسىندا بەيبىتشىلىك كەلىسىمىنە قول قويۋ جولىندا ءبىرشاما جەتىستىككە قول جەتكىزدىك. كەلىسىم جوباسىنىڭ 17 بابىنىڭ پرەامبۋلاسى مەن 15- ءىن كەلىستىك. ال ەگەر ساياسي ەرىك جەتكىلىكتى بولسا، ونى تەز ارادا جاساپ، قول قويۋعا بولادى، - دەگەن ارارات ميرزويان ارمەنيانىڭ كەلىسىمگە قول قويۋعا دايىن ەكەنىن اتاپ ءوتتى.
ۇستىمىزدەگى جىلدىڭ تامىز ايىندا ارمەنيا پرەمەر-ءمينيسترى نيكول پاشينيان تاراپتار بەيبىت كەلىسىمنىڭ 17 بابىنىڭ 13- ءى بويىنشا كەلىسىمگە كەلگەنىن مالىمدەگەن.
قىركۇيەك ايىندا ارمەنيا مينيسترلەر كابينەتىنىڭ باسشىسى ازەربايجاندى 16 باپتان تۇراتىن بىتىمگەرشىلىك كەلىسىمگە قول قويۋعا شاقىرىپ، تاراپتار بىتىمگەرشىلىك شارتتىڭ 13 جانە ءىشىنارا تاعى 3 بابى بويىنشا تولىق كەلىسكەنىن اتاپ ءوتتى.
كەيىن ازەربايجان سىرتقى ىستەر مينيسترلىگى باسپا ءسوز قىزمەتىنىڭ جەتەكشىسى ايحان حادجيزادە جەرگىلىكتى ب ا ق وكىلدەرىنە بەرگەن سۇحباتىندا ارمەنيا ۇسىنعان ءتاسىل - قازىرگى كەزدە كەلىسىلگەن ەرەجەلەرگە عانا نەگىزدەلگەن بەيبىت كەلىسىمگە قول قويۋ باكۋ ءۇشىن قولايسىز ەكەنىن مالىمدەدى.
13- قاراشادا ارمەنيا ۇلتتىق اسسامبلەياسىندا سويلەگەن سوزىندە نيكول پاشينيان ەريەۆان باكۋگە بەيبىت كەلىسىمنىڭ كەلىسىلمەگەن ەكى بابى بويىنشا ءوز ۇسىنىستارىن جىبەرگەنىن ايتتى.
قازاقستان پرەزيدەنتى قاسىم-جومارت توقايەۆ فرانسۋزدىق Le Figaro گازەتىندەگى پىكىرىندە قازاقستان ازەربايجان مەن ارمەنيانىڭ قارىم-قاتىناسىنداعى جاڭا ۇمتىلىستى تولىق قولدايتىنىن جازدى.
ەركەجان سماعۇلوۆا
