ەۋرووداق يرانعا قارسى سانكسيالاردى تاعى ءبىر جىلعا ۇزارتتى
استانا. KAZINFORM - ەۋروپالىق وداق يراننىڭ رەسەيگە اسكەري قولداۋ كورسەتۋدەگى، سونداي-اق ايماقتاعى يسلامدىق قارسىلاسۋ توپتارىن قامتاماسىز ەتۋدەگى ءرولى تۋرالى مالىمدەمەلەردى قايتالاي وتىرىپ، يرانعا قاتىستى سانكسيالاردى تاعى ءبىر جىلعا ۇزارتتى، دەپ جازادى يرنا اگەنتتىگى.
يرانعا قارسى سانكسيالار 2025-جىلدىڭ 27-شىلدەسىنە دەيىن ۇزارتىلدى. جىل سايىن قايتا قارالاتىن بۇل سانكسيالارعا يراننىڭ نەمەسە يرانمەن بايلانىستى 12 جەكە جانە 9 زاڭدى تۇلعاسى كىرەدى.
جاريالانعان مالىمدەمەگە سايكەس، سانكسيالانعان ادامدار مەن مەكەمەلەردىڭ اكتيۆتەرى ساقتالادى. ال ە و كومپانيالارى مەن ازاماتتارىنا ولارمەن قارجىلىق قاتىناستارعا تۇسۋگە تىيىم سالىنادى. سونداي-اق، سانكسيالانعان جەكە تۇلعالارعا ە و- عا مۇشە ەلدەر ارقىلى كىرۋگە نەمەسە وتۋگە تىيىم سالىنادى.
«يراندىق جانە رەسەيلىك شەنەۋنىكتەر ۋكرايناداعى سوعىسقا بايلانىستى اسكەري ىنتىماقتاستىق تۋرالى تالاپتاردى بىرنەشە رەت جوققا شىعاردى. ءبىراق وتكەن جازدان باستاپ ە و سيونيستىك رەجيمنىڭ نۇسقاۋىمەن جانە يران يسلام رەسپۋبليكاسىنىڭ قارسىلاستارىنىڭ قىسىمىمەن تەگەرانعا قارسى ءبىرقاتار سانكتسيا ەنگىزدى. سونداي-اق وداق وتكەن ساۋىردە يرانعا قارسى سانكسيالاردى يراندىق زىمىراندار مەن درونداردى تاسىمالداۋعا قاتىساتىن ادامدار مەن ۇيىمداردى نىساناعا الۋ ءۇشىن «ادال ۋادە» وپەراتسياسى اياسىندا كۇشەيتتى»، - دەلىنگەن يرنا حابارلاماسىندا.
