ەۋرووداق تاياۋ شىعىستاعى قاقتىعىستا 130عا جۋىق جۋرناليستىڭ ولتىرىلگەنىن ايىپتادى
استانا. KAZINFORM - ەۋرووداق 2023 -جىلدىڭ قازان ايىنان بەرى تاياۋ شىعىستاعى قاقتىعىستا 130 عا جۋىق جۋرناليستىڭ ولتىرىلگەنىن ايىپتادى. بۇل تۋرالى ە و ديپلوماتياسىنىڭ باسشىسى دجوزەپ بوررەلل X (بۇرىنعى Twitter) جەلىسىندە جازدى، دەپ حابارلايدى Kazinform اگەنتتىگى رەسەيلىك تاسس-قا سىلتەمە جاساپ.
«جۋرناليستەر تاياۋ شىعىستاعى قاقتىعىستاردان اقپارات تاراتامىز دەپ ءوز ومىرلەرىن قۇربان ەتىپ جاتىر. بۇگىن يزرايل قورعانىس كۇشتەرىنىڭ ليۆانعا جاساعان سوققىسىنان ءۇش ادام قازا تاپتى. گازا سەكتورىندا سوڭعى جىلدا 130-عا جۋىق جۋرناليست كوز جۇمعان. ءبىز مۇنى ايىپتايمىز»، - دەيدى ول.
تاياۋ شىعىستاعى جاعداي 2023 -جىلدىڭ 7-قازانىندا گازا سەكتورىنان حاماس اسكەرلەرىنىڭ يزرايل اۋماعىنا كىرۋىنەن كۇرت ناشارلاپ كەتتى. ولار شەكارالىق ەلدى مەكەندەردىڭ تۇرعىندارىن ءولتىرىپ، ادامداردى كەپىلگە الدى. حاماس بۇل شابۋىلدى يزرايلدىڭ يەرۋساليمدەگى ءال-اقسا مەشىتىندەگى ارەكەتىنە جاۋاپ دەپ اتادى.
سودان كەيىن يزرايل گازا سەكتورىن تولىق بلوكاداعا العانىن جاريالاپ، پالەستينا انكلاۆىن، ليۆان مەن سيريانىڭ ءبىر بولىگىنە سوققى جاساي باستادى.
وسىعان دەيىن ا ق ش مەملەكەتتىك حاتشىسى ەنتوني بلينكەننىڭ ءيزرايلدىڭ گازادان كەپىلگە الىنعانداردى ۇيلەرىنە قايتارۋ جانە سوعىس ارەكەتتەرىن توقتاتۋعا ۇمتىلۋى كەرەكتىگىن ايتقانىن جازعان ەدىك.
اۆتور
تالعاتجان مۇحامەتبەك ۇلى
