پروكۋرور مەن بيشىمبايەۆتىڭ ادۆوكاتى سوتتا سوزگە كەلىپ قالدى
استانا. KAZINFORM – قۋاندىق بيشىمبايەۆقا قاتىستى سوت وتىرىسىندا پروكۋرور مەن سوتتالۋشىنىڭ ادۆوكاتى اراسىندا داۋ تۋدى.
قۋاندىق بيشىمبايەۆ كۋالىك بەرۋ كەزىندە سالتانات نۇكەنوۆا وتباسىندا بولعان ماسەلەلەردىڭ ەگجەي-تەگجەيىن بولىسكەنىن، اكەسىنىڭ پسيحيكالىق اۋىتقۋى بار ەكەنىن ايتقانىن جەتكىزدى. سوتتالۋشى نۇكەنوۆانىڭ مىنەز-قۇلقىندا دا تۇراقسىز پسيحيكالىق جاعدايدىڭ بەلگىلەرى بار دەپ مالىمدەدى.
وسى كەزدە پروكۋرور ايجان ايماعانوۆا قارسىلىق ءبىلدىردى. بيشىمبايەۆتىڭ ادۆوكاتتارىنىڭ ءبىرى مەملەكەتتىك ايىپتاۋشىمەن سوزگە كەلىپ قالدى.
«سوتتالۋشىعا كۋالىك بەرۋگە مۇمكىندىك بەرىڭىز»، - دەدى قورعاۋشى.
«ءبىز كەدەرگى بولىپ تۇرعان جوقپىز. كۋالىك بەرىڭىز»، - دەپ جاۋاپ بەردى پروكۋرور.
جانجالعا سۋديا ايجان كۋلبايەۆا ارالاسىپ، پروتسەسكە قاتىسۋشىلارعا ەسكەرتۋ جاسادى.
«ءبىر مينۋت! سوت زالىندا سابىر ساقتاڭىزدار. مەن 345، 346-باپتاردىڭ تالابىن تاعى ءبىر رەت اتاپ وتكىم كەلەدى جانە سوت وتىرىسىنىڭ ءتارتىبىن بارلىق تاراپ قامتاماسىز ەتۋى ءتيىس ەكەنىن سوت وتىرىسىنا قاتىسقانداردىڭ بارىنە ەسكەرتەمىن. سوتقا عانا ەمەس، پروتسەستىڭ باسقا قاتىسۋشىلارىنا دا قۇرمەت كورسەتۋ قاجەت. سوندىقتان ءبىر-ءبىرىڭىزدىڭ ءسوزىن ءبولىپ، قارسى تاراپتىڭ ءۋاجىن ءۇزۋدىڭ قاجەتى جوق»، - دەدى كۋلبايەۆا.
كەيىن پروكۋرور سوتالدى تەرگەۋ بارىسىندا بيشىمبايەۆتىڭ بەس رەت كۋالىك بەرۋدەن باس تارتقانىن ەسكە سالدى.
«قۇرمەتتى سوت، القابيلەر ءتۇسىنۋى ءۇشىن ايتىپ وتەيىنشى. بيشىمبايەۆ سوتقا دەيىنگى كەزەڭدە بۇل تۋرالى ايتتىم دەيدى. ول بۇل تۋرالى قاشان ايتتى؟ بەس رەت ءسىز (بيشىمبايەۆ - ەسك.) كۋالىك بەرۋدەن باس تارتتىڭىز. بەس رەت، قۇرمەتتى سوت. ول بۇل تۋرالى قاشان ايتتى؟ قۇرمەتتى القابيلەردى اداستىرماسىن. ونىڭ قازىر ايتىپ جاتقان تۇسىنىكتەمەلەرىنە تاعى دا قارسىلىق بىلدىرەمىن. ءىستىڭ ءمان-جايى بويىنشا كۋالىك بەرسىن»، - دەدى ايجان ايماعانوۆا.
قۋاندىق بيشىمبايەۆ سالتاناتتىڭ اكەسىنە قاتىستى بەرگەن ايعاقتارى سوتالدى تەرگەۋ ماتەريالدارىندا بار دەپ سەندىردى. بۇعان جاۋاپ رەتىندە زارداپ شەككەن تاراپتىڭ ادۆوكاتتارى سوتقا سالتانات نۇكەنوۆانىڭ اكەسىنىڭ پسيحيكالىق جاعدايى تۋرالى انىقتاما بەردى. قۇجاتقا سايكەس، بيشىمبايەۆتىڭ ءسوزى راستالمادى: ەر ادام پسيحياتردا ەسەپتە تۇرماعان. قورعاۋشىلار انىقتامانى ءىس ماتەريالدارىنا تىركەپ، القابيلەرگە كورسەتۋدى سۇرادى.
بۇل رەتتە سۋديا ايجان كۋلبايەۆا قاتتى سويلەگەنى ءۇشىن پروكۋرورعا ەسكەرتۋ جاسادى.
«سوت ايىپتالۋشىمەن سوزگە كەلىپ، باپ تالابىن ۇمىتىپ كەتكەنى ءۇشىن ايىپتاۋشى تاراپقا ەسكەرتۋ جاسايدى. پروكۋرور ءىس بويىنشا ءتوراعالىق ەتۋشىگە ءوتىنىش ءبىلدىرۋى كەرەك، سودان كەيىن سوت ءتيىستى شارالاردى قولدانادى. بۇل بىرىنشىدەن. ەكىنشىدەن، سوت داۋىس كوتەرۋگە قاتىستى ەسكەرتۋ جاسايدى. بۇل - سوت زالى. ءسىز ايعايعا كوشىپ باراسىز. سابىر ساقتاڭىزدار، ايىپتاۋشى تاراپ»، - دەدى كۋلبايەۆا.
Massaget.kz
