پروكۋرور ەكس-مينيستر مۇحامەدي ۇلىن 12 جىلعا باس بوستاندىعىنان ايىرۋدى سۇرادى
استانادا قازاقستان ۇلتتىق مۋزەيىنىڭ بۇرىنعى ديرەكتورى، مادەنيەت جانە سپورت ەكس-ءمينيسترى ارىستانبەك مۇحامەدي ۇلىنا قاتىستى كەزەكتى سوت پروتسەسى ءوتىپ جاتىر.
سوت وتىرىسى بارىسىندا پروكۋرور مۇحامەدي ۇلىنا 12 جىلعا باس بوستاندىعىنان ايىرۋ جازاسىن تاعايىنداۋدى سۇرادى، - دەپ حابارلايدى Massaget.kz ءتىلشىسى.
مەملەكەتتىك ايىپتاۋشى ولجاس حايرۋللايەۆ مۇحامەدي ۇلىن قىلمىستىق كودەكستىڭ بىرنەشە بابى بويىنشا كىنالى دەپ تانۋدى سۇرادى. ولاردىڭ ىشىندە قىلمىستى ۇيىمداستىرۋ، سەنىپ تاپسىرىلعان بوتەننىڭ مۇلكىن اسا ءىرى مولشەردە يەمدەنۋ نەمەسە ىسىراپ ەتۋ، اۋىر زارداپتارعا اكەپ سوققان لاۋازىمدىق وكىلەتتىكتەردى تەرىس پايدالانۋ، قىلمىسقا وقتالۋ جانە رەيدەرلىك ارەكەتتەر بار.
«ارىستانبەك مۇحامەدي ۇلى مەملەكەتتىك قىزمەتتە جانە كۆازيمەملەكەتتىك سەكتوردا قىزمەت اتقارۋ قۇقىعىنان ءومىر بويىنا ايىرا وتىرىپ، 12 جىلعا باس بوستاندىعىنان ايىرۋ تۇرىندەگى جازا تاعايىندالسىن. جازا قىلمىستىق-اتقارۋ جۇيەسىنىڭ ورتاشا قاۋىپسىز مەكەمەسىندە وتەلسىن»، - دەدى حايرۋللايەۆ.
سونىمەن قاتار، پروكۋرور مۇحامەدي ۇلىنىڭ سەرىكتەستەرى ءۇشىن ءتۇرلى جازا تاعايىنداۋىن سۇرادى. ەكس-شەنەۋنىكتەن باسقا التى ادام جاۋاپقا تارتىلىپ جاتىر.
ەسكە سالايىق، 13- اقپاندا استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى قازاقستان ۇلتتىق مۋزەيىنىڭ بۇرىنعى ديرەكتورى، مادەنيەت جانە سپورت ەكس-ءمينيسترى ارىستانبەك مۇحامەدي ۇلىنا ۇكىم شىعاردى. ول اسا ءىرى مولشەردە پارا بەرۋگە وقتالعانى ءۇشىن كىنالى دەپ تانىلدى.
