ەرتىسپەن جۇك تاسىمالداۋ ءۇشىن رەسەي جانە قىتاي تاراپتارىمەن كەلىسسوز جۇرگىزىلىپ جاتىر
ەرتىس وزەنىمەن مۋلتيمودالدى ترانزيتتىك تاسىمال ۇيىمداستىرۋ ءۇشىن رەسەي جانە قىتاي تاراپتارىمەن كەلىسسوز جۇرگىزىلىپ جاتىر.
بۇل جايىندا ءماجىلىس دەپۋتاتتارىنىڭ ساۋالىنا پرەمەر- ءمينيستردىڭ ءبىرىنشى ورىنباسارى رومان سكلياردىڭ جاۋابىندا ايتىلعان، دەپ حابارلايدى Kazinform.
«قازاقستان رەسپۋبليكاسىنىڭ اۋماعىندا ەرتىس ترانسشەكارالىق وزەنىنىڭ پايدالانىلاتىن كەمە قاتىناسى ۋچاسكەلەرىنىڭ ۇزىندىعى 1600,5 شاقىرىم. 2023 -جىلعى 1 - قىركۇيەكتەگى جاعداي بويىنشا ەرتىس باسسەينىندە تاسىمالداۋ كولەمى 1,1 ميلليون توننا بولدى. كەمە ءجۇرىسىنىڭ گاباريتتەرىن قامتاماسىز ەتۋ ماقساتىندا ەرتىس وزەنىندە شامامەن 2,3 ميلليون تەكشە مەتر كولەمىندە ءتۇبىن تەرەڭدەتۋ جۇمىستارى جۇرگىزىلۋدە. بۇل 2022 -جىلعى كولەمنەن 64 پايىزعا ارتىق»، - دەدى ۇكىمەت باسشىسىنىڭ ءبىرىنشى ورىنباسارى.
ونىڭ اتاپ وتۋىنشە، قازاقستاننىڭ كولىك- لوگيستيكالىق الەۋەتىن دامىتۋدىڭ 2030 -جىلعا دەيىنگى بەكىتىلگەن تۇجىرىمداماسىنا سايكەس «قىتاي- قازاقستان- رەسەي» باعىتىندا ەرتىس وزەنىمەن مۋلتيمودالدى ترانزيتتىك تاسىمالداردى ۇيىمداستىرۋ كوزدەلەدى.
«وسىعان بايلانىستى رەسەي جانە قىتاي تاراپتارىمەن وسى تاسىمالداردى ۇيىمداستىرۋ بويىنشا كەلىسسوزدەر جۇرگىزىلىپ جاتىر. سونداي- اق رەسەي مەن قىتايعا سىناق رەيسىن جۇزەگە اسىرۋ بويىنشا جۇمىستار جۇرگىزىلىپ جاتىر. جوعارىدا اتالعان ءىس- شارالاردى ىسكە اسىرۋ وزەن كولىگىمەن جۇك تاسىمالداۋ كولەمىن 2030 -جىلعا قاراي جىلىنا 2,5 ميلليون تونناعا دەيىن ۇلعايتۋعا مۇمكىندىك بەرەدى»، - دەدى رومان سكليار.
