«ەرتىس ورمانىنداعى» قاراعاي اراسىنان سىلەۋسىن كوزگە ءتۇستى
پاۆلودار. KAZINFORM - سىلەۋسىن ادام كوزىنە ءجيى تۇسە بەرمەيتىن جىرتقىش اڭ. ورمانشىلاردىڭ ەسەبىنشە، پاۆلودار وبلىسىندا شامامەن 100 دەن استام سىلەۋسىن بار.
سولتۇستىكتەگى جالقاراعاي ورماندارى اراسىن كەزەكتى پاترۋلدەۋ كەزىندە مەملەكەتتىك ينسپەكتورلار سىلەۋسىندى كەزىكتىرىپ، كامەراعا ءتۇسىرىپ العان.
«ەرتىس ورمانى» رەزەرۆاتىنىڭ باسپا ءسوز قىزمەتكەرى اراي اتىعايەۆانىڭ ايتۋىنشا، مىسىق تۇقىمداس اڭ كۇنىنە 30 شاقىرىم جەردى باسىپ وتە الادى.
«وتە شاپشاڭ ءارى سىبدىرسىز جۇرەدى، سەكىرگەندە 4-5 مەتر جەرگە بارىپ تۇسەدى. كۇنىنە ەكى كيلوگرامعا دەيىن ەت جەيدى. ال قۇلاق قالقانىنىڭ ءۇشبۇرىشتى بولۋىنىڭ دا وزىندىك سەبەبى بار، ونىڭ كومەگىمەن قاۋىپ ءتونىپ كەلە جاتقانى تۋرالى الدىن الا ءبىلىپ وتىرادى. بۇل وتە ساق جانۋار، ءتىپتى قاردىڭ ۇستىندە ءىز قالدىرماي كەتەتىن كەزدەرى بولادى»، - دەيدى ول.
رەزەرۆاتتا الدىڭعى جىلى شامامەن 60 تان استام سىلەۋسىن سانالعان.
جىرتقىش اڭ پاۆلودار وبلىسىنىڭ باياناۋىل اۋدانىندا دا بار. وندا وتكەن جىلى 40 تان استامى تىركەلگەن. ۇلتتىق پاركتىڭ مەملەكەتتىك ينسپەكتورى، ولكەتانۋشى التىنبەك قۇرمانوۆ سىلەۋسىندەر قىستا ءجيى كوزگە تۇسەتىنىن ايتادى.
«كوبىنە تاۋدا قويان اۋلاپ جەيدى. باياناۋىلدا قىس ايلارىندا دەمالۋشىلار بولمايدى. سوندىقتان اڭداردىڭ كوبى ەلدى مەكەندەرگە جاقىن ورماندارعا دا كەلە باستايدى. ءبىرلى- جارىم ۇساق مالعا دا شابۋىلداۋى مۇمكىن»، دەيدى ول.
