ەرتەڭنەن باستاپ ماگيستراتۋرا مەن دوكتورانتۋراعا تۇسۋگە قۇجات قابىلدانادى

تىركەلۋ ۇلتتىق تەستىلەۋ ورتالىعىنىڭ app.testcenter.kz سايتىندا وتەدى. ك ت- عا تىركەلۋ 2023-جىلعى 10- قاراشاعا دەيىن جالعاسادى.

تەستىلەۋدىڭ ءوزى قاراشا-جەلتوقسان ايلارىندا وتەدى.

ءوتىنىش بەرۋ كەزىندە ءتۇسۋشى تەستىلەۋدى تاپسىرۋ قالاسىن ءوز ەركىمەن تاڭدايدى.

ۇمىتكەرلەر ءوتىنىشتى قابىلداۋ مەرزىمى اياقتالعانعا دەيىن (10- قاراشاعا دەيىن) ءبىلىم بەرۋ باعدارلامالارىنىڭ توبى، ءتىلى جانە تەستىلەۋدى تاپسىرۋ قالاسىن بويىنشا وتىنىشكە وزگەرىستەر ەنگىزە الادى.

تەستىلەۋدى وتكىزۋ كۇنى تۋرالى اقپارات وقۋعا ءتۇسۋشىنىڭ جەكە كابينەتىندە 15- قاراشادا قولجەتىمدى بولادى.

كەشەندى تەستىلەۋ فورماتىندا وزگەرىستەر جوق، ول ەلەكتروندىق فورماتتا وتكىزىلىپ، ءۇش بلوكتان تۇرادى: شەت ءتىلى بويىنشا تەست، وقۋعا دايىندىعىن انىقتاۋعا ارنالعان تەست جانە ءبىلىم باعدارلامالارى توبىنىڭ بەيىنى بويىنشا تەست.

بيىل عىلىمي-پەداگوگيكالىق ماگيستراتۋراعا ءتۇسۋ ءۇشىن شەكتى بال - 75 بالدى، بەيىندىك ماگيستراتۋراعا ءتۇسۋ ءۇشىن 50 بالدى قۇرايدى.

كەشەندى تەستىلەۋ ناتيجەسىمەن كەلىسپەگەن جاعدايدا وقۋعا تۇسۋشىلەر تەستىلەۋ اياقتالعاننان كەيىن ونلاين-اپەللياتسياعا بەرە الادى.

دوكتورانتۋراعا ءتۇسۋ ەمتيحانىنا تىركەلۋ 2023-جىلعى 10- قاراشاعا دەيىن جالعاسادى. ءتۇسۋ ەمتيحانى قاراشا-جەلتوقسان ايلارىندا وتەدى.

ەستەرىڭىزگە سالا كەتەيىك، دوكتورانتۋراعا ءتۇسۋ ءۇشىن تەك ءبىر جوعارى وقۋ ورنىن جانە ءبىلىم باعدارلامالارىنىڭ ءبىر توبىن تاڭداۋعا بولادى.

ەگەر وقۋعا تۇسۋشىگە بەرىلگەن وتىنىشكە (تەستىلەۋدى تاپسىرۋ قالاسى، ءبىلىم بەرۋ باعدارلامالارىنىڭ توبى، تەستىلەۋدى تاپسىرۋ ءتىلى) وزگەرىستەر ەنگىزۋ قاجەت بولعان جاعدايدا، وعان وتىنىشتەردى قابىلداۋ بازاسى جابىلعانعا دەيىن (10- قاراشاعا دەيىن) ءوتىنىشتى وڭدەۋگە نەمەسە وشىرۋگە مۇمكىندىك بەرىلەدى.

ءتۇسۋ ەمتيحانىن وتكىزۋ ورنى مەن ۋاقىتى تۋرالى اقپارات وقۋعا ءتۇسۋشىنىڭ جەكە كابينەتىندە 23 قاراشادا قولجەتىمدى بولادى.

دوكتورانتۋراعا ءتۇسۋ ەمتيحانىنا ەسسە جازۋ، دوكتورانتۋراعا دايىندىق تەستى جانە ءبىلىم بەرۋ باعدارلاماسى توبىنىڭ بەيىنى بويىنشا ەمتيحان كىرەدى.

جالپى، ءتۇسۋ ەمتيحانىنىڭ ەڭ جوعارى بالى - 100 بال، ونىڭ ىشىندە اڭگىمەلەسۋ - 20 بال، ەسسە - 10 بال، دوكتورانتۋرادا وقۋعا دايىندىعىن انىقتاۋعا ارنالعان تەست - 30 بال، بەيىنى بويىنشا ەمتيحان سۇراقتارى - 40 بال.

ال مەملەكەتتىك ءبىلىم بەرۋ تاپسىرىسى بويىنشا كونكۋرسقا قاتىسۋ ءۇشىن جانە اقىلى نەگىزدە دوكتورانتۋراعا ءتۇسۋ ءۇشىن شەكتى بال - 75.

سونداي-اق بولاشاق دوكتورانتتاردىڭ مەملەكەتتىك جانە شەت تىلدەرىن مەڭگەرگەندىگىن راستايتىن سەرتيفيكاتتارى بولۋى قاجەت.

اتاپ وتەيىك، جازعى تەستىلەۋگە كىرگىزۋ كەزىندە ەرەجەلەردى بۇزعان، سونداي-اق ناتيجەلەرى جويىلعان تەست تاپسىرۋشىلار وسى ەمتيحاندارعا قايتا قاتىسا المايدى.

ماگيستراتۋراعا تۇسۋشىلەرگە 3,8 مىڭ، ال بولاشاق دوكتورانتتارعا 700 دەن استام مەملەكەتتىك ءبىلىم گرانتى ءبولىندى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى