ەرتەڭ وزبەكستان باسشىسى شاۆكات ميرزيەيەۆ استاناعا كەلەدى
تاشكەنت. KAZINFORM - وزبەكستان پرەزيدەنتى شاۆكات ميرزيەيەۆ 17-قىركۇيەكتە وتەتىن «ورتالىق ازيا + گەرمانيا» سامميتىنە قاتىسۋ ءۇشىن استاناعا جۇمىس ساپارىمەن بارادى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
سامميتتە ورتالىق ازيا ەلدەرىنىڭ گەرمانيامەن ىنتىماقتاستىعىن دامىتۋ جانە تەرەڭدەتۋ ماسەلەلەرى قارالماق.
«سامميتتە ساۋدا-ەكونوميكالىق، ينۆەستيتسيا، تەحنولوگيا، كولىك-كوممۋنيكاتسيالىق جانە باسقا دا باسىم باعىتتارداعى ءوزارا ءىس-قيمىلدى كەڭەيتۋگە ەرەكشە نازار اۋدارىلادى. سونداي-اق، جەتەكشى نەمىس كومپانيالارى جانە بانكتەرىنىڭ باسشىلارىمەن بىرلەسكەن كەزدەسۋ وتكىزۋ جوسپارلانىپ وتىر»، - دەلىنگەن وزبەكستان پرەزيدەنتىنىڭ باسپا ءسوز قىزمەتى تاراتقان حابارلامادا.
ايتا كەتسەك، «ورتالىق ازيا+گەرمانيا» فورماتىنداعى ءبىرىنشى كەزدەسۋ بىلتىر 29-قىركۇيەكتە بەرلين قالاسىندا وتكەن بولاتىن.
ەسكە سالايىق، بۇگىن گەرمانيا كانتسلەرى ولاف شولتس قازاقستانعا رەسمي ساپارمەن كەلدى. وعان دەيىن ول وزبەكستاندا بولىپ، شاۆكات ميرزيەيەۆپەن كەلىسسوز جۇرگىزگەن ەدى.
