ەرتەڭ ءبىر مەزگىلدە ەل بويىنشا دابىل سيرەنالارى ىسكە قوسىلادى
ەرتەڭ، 23-قاراشا كۇنى، استانا ۋاقىتىمەن ساعات 12:55 تە رەسپۋبليكا بويىنشا حالىقتى قۇلاقتاندىرۋ سيرەنالارى ىسكە قوسىلادى. kazinform بۇل تۋرالى توتەنشە جاعدايلار مينيسترلىگىنە سىلتەمە جاساپ حابارلايدى.
ۆەدومستۆو مالىمەتىنە سۇيەنسەك، ەل بويىنشا ءبىر مەزگىلدە قۇلاقتاندىرۋ جۇيەسىن تەكسەرۋ جۇرگىزىلەدى. ول ءۇشىن ەلەكتر سيرەنالارى، سيرەنالىق- سويلەۋ قۇرىلعىلارى ىسكە قوسىلىپ، تەليەۆيدەنيە جانە راديوعا قوسىلۋ جۇرگىزىلەدى.
ءىس- شارا «قىس-2023» رەسپۋبليكالىق كوماندالىق- شتابتىق وقۋ- جاتتىعۋى اياسىندا وتكىزىلگەلى وتىر.
«ەستەرىڭىزگە سالا كەتەيىك، توتەنشە جاعداي ورىن العان كەزدە حالىقتىڭ نازارىن اۋدارۋ ءۇشىن ەلەكتر سيرەنالارى، سيرەنالىق- سويلەۋ قۇرىلعىلارى نەمەسە باسقا دا دابىل قۇرالدارى قوسىلادى، ول «بارشانىڭ نازارىنا!» ءبىرىڭعاي قۇلاقتاندىرۋ دابىلىن بىلدىرەدى.
بۇل دابىلدى ەستىگەن كەزدە تۇرعىندار سول مەزەتتە ارەكەت ەتۋ تۋرالى مالىمەتتەر مەن نۇسقاۋلار الۋ ءۇشىن قولجەتىمدى اقپارات قابىلداۋ قۇرالدارىن (تەلەارنالار، راديولار، ينتەرنەت سايتتار، الەۋمەتتىك جەلىلەر، موبيلدىك قۇرىلعىلارعا ارنالعان قوسىمشالار جانە تاعى باسقاسى) دەرەۋ قوسۋى كەرەك.
توتەنشە جاعدايلار مينيسترلىگى ازاماتتاردى سابىر ساقتاپ، ۇرەيگە بوي الدىرماۋعا شاقىرادى»، - دەلىنگەن اقپاراتتا.
