رەسەيمەن سەرىكتەستىك سۋ رەسۋرستارىن ءتيىمدى پايدالانۋعا قاتىستى تەڭگەرىمدى ءتاسىلدىڭ كەپىلى بولادى - پرەزيدەنت
رەسەيمەن ستراتەگيالىق سەرىكتەستىك قارىم- قاتىناسىمىز سۋ رەسۋرستارىن ءتيىمدى پايدالانۋعا قاتىستى تەڭگەرىمدى ءتاسىلدىڭ كەپىلى بولادى. بۇل تۋرالى قازاقستان مەن رەسەيدىڭ XIX ءوڭىرارالىق ىنتىماقتاستىق فورۋمىندا مەملەكەت باسشىسى قاسىم- جومارت توقايەۆ ايتتى، دەپ حابارلايدى Kazinform.
«ەكونوميكامىزدىڭ نەگىزگى سالالارىندا، اسىرەسە، اۋىل شارۋاشىلىعىندا سۋدىڭ كوپ مولشەردە پايدالانىلۋى جاعدايدى ودان سايىن كۇردەلەندىرە ءتۇستى. ساراپشىلاردىڭ بولجامىنشا، 2050 -جىلعا قاراي ورتالىق ازياداعى قۇرعاقشىلىق پەن سۋ تاسقىنى ونىمدىلىكتى 30 پايىزعا دەيىن تومەندەتۋى مۇمكىن. ءبىزدىڭ اگرارلىق سەكتور 60 پايىزدان استام سۋ تۇتىنادى جانە سۋ ۇنەمدەيتىن تەحنولوگيالاردى جاپپاي ەنگىزۋدى تالاپ ەتەدى. بۇل بارىنشا وزەكتى مىندەت. وسىناۋ سىن- تەگەۋىرىندەرگە جاۋاپ بەرتىندە سۋ سەكتورىن جاڭعىرتۋعا كىرىستىك. جاڭادان 20 سۋ قويماسىن سالىپ، كەم دەگەندە 15 سۋ قويماسىن رەكونسترۋكتسيالاۋ، سونداي- اق 3500 شاقىرىمنان استام كانالدى جاڭعىرتۋ جانە سيفرلاندىرۋ جوسپارلانىپ وتىر. بۇل شارالار 2027 -جىلعا قاراي قوسىمشا 2 تەكشە كيلومەترگە جۋىق سۋمەن قامتاماسىز ەتۋگە مۇمكىندىك بەرەدى»، - دەدى قاسىم- جومارت توقايەۆ.
مەملەكەت باسشىسى قازاقستاندا جاڭا سۋ كودەكسى ازىرلەنىپ جاتقانىن ايتتى.
«بۇل قۇجات سۋ رەسۋرستارىنىڭ تاپشىلىعىن ازايتۋعا باعىتتالعان. رەسەيمەن بىرگە جايىق، ەرتىس سەكىلدى ءىرى وزەندەردىڭ باسسەيىندەرىندە زەرتتەۋ جۇرگىزۋ جونىندەگى ىنتىماقتاستىقتى جانداندىرۋ ءۇشىن ءبىرىڭعاي جول كارتاسى جۇزەگە اسىرىلىپ جاتىر. مۇنداي كۇردەلى پروبلەمانى شەشۋگە ءبىر عانا ەلدىڭ كۇش- جىگەرى جەتپەيدى. بۇل ماسەلەنى مۇددەلەر تەڭگەرىمىن ساقتاپ، بىرلەسە ارەكەت ەتۋ ارقىلى شەشۋ قاجەت. وسى مۇمكىندىكتى پايدالانا وتىرىپ، ءبىزدىڭ رەسەيمەن ستراتەگيالىق سەرىكتەستىك قارىم- قاتىناسىمىز ەكى ەل حالىقتارىنىڭ مۇددەسى جولىندا سۋ رەسۋرستارىن بىرلەسە ءتيىمدى پايدالانۋعا قاتىستى تەڭگەرىمدى ءتاسىلدىڭ كەپىلى بولاتىنىنا سەنىمدىمىن»، - دەدى قاسىم- جومارت توقايەۆ.
اۆتور
مارلان جيەمباي
