رەسەيمەن شەكارادا ۇزىن-سونار كەزەك: مەملەكەتتىك كىرىستەر كوميتەتى بۇل اقپاراتتى جوققا شىعاردى
استانا. KAZINFORM - ق ر قارجى مينيسترلىگىنىڭ مەملەكەتتىك كىرىستەر كوميتەتى قازىرگى تاڭدا «جايساڭ» وتكىزۋ بەكەتىندە جۇك كولىكتەرىنىڭ كەپتەلىسى جوق ەكەنىن حابارلادى.
بۇعان دەيىن بۇقارالىق اقپارات قۇرالدارىندا اقتوبە وبلىسىنداعى «جايساڭ» بەكەتىنىڭ الدىندا جۇك كولىكتەرىنىڭ بىرنەشە شاقىرىمدىق كەزەگى قالىپتاسقانى تۋرالى اقپارات تاراعان بولاتىن.
- وسىعان بايلانىستى مەملەكەتتىك كىرىستەر كوميتەتى قازىرگى ۋاقىتتا «جايساڭ» وتكىزۋ بەكەتىندە جۇك كولىكتەرى كەپتەلىسىنىڭ جوقتىعىن، باقىلاۋ- وتكىزۋ بەكەتىنىڭ قالىپتى رەجيمدە جۇمىس ىستەپ جاتقانىن حابارلايدى. تاۋلىك ىشىندە رەسەي فەدەراتسياسىنىڭ شەكاراسىنان ءوتۋ ءۇشىن كەزەكتە تۇرعان جۇك كولىكتەرىنىڭ سانى 50 كولىكتەن اسپايدى، - دەلىنگەن ۆەدومستۆو حابارلاماسىندا.
«جايساڭ» بەكەتىنەن كۇنىنە ورتا ەسەپپەن 1,6 مىڭنان استام جۇك جانە جەڭىل كولىك وتەدى.
سونداي-اق، كوميتەت شەكارانىڭ قازاقستان جاعىنداعى وتكىزۋ بەكەتىندە ءار باعىتتا ءتورت جول سىزىعى، رەسەي جاعىنان «ساعارچين» وتكىزۋ بەكەتىندە ءبىر جولاق بار ەكەنىن اتاپ ءوتتى.
- مەملەكەتتىك كىرىستەر ورگاندارى تاراپىنان جۇمىس ادەتتەگىدەي جۇرگىزىلىپ جاتىر، باقىلاۋ- وتكىزۋ پۋنكتىندە بارلىق قۇجاتتى تىركەۋ تەرەزەلەرىنىڭ جۇمىسىن قامتاماسىز ەتەتىن 4 قىزمەتكەر جۇمىس ىستەيدى، وتكىزۋ پۋنكتى ىشىندە جۇرگىزۋشىلەر مەن اۆتوكولىكتەردىڭ كەزەگى جوق، - دەلىنگەن حابارلامادا.
اۆتور
ەركەجان سماعۇلوۆا
