رەسەيدىڭ 76 ءوڭىرى قازاقستان وبلىستارىمەن تىكەلەي ارىپتەستىك بايلانىس ورناتتى - ۆلاديمير پۋتين
رەسەيدىڭ 76 ءوڭىرى قازاقستان وبلىستارىمەن تىكەلەي ارىپتەستىك بايلانىس ورناتتى.
بۇل تۋرالى بۇل تۋرالى قوستانايدا ءوتىپ جاتقان قازاقستان مەن رەسەيدىڭ XIX ءوڭىرارالىق ىنتىماقتاستىق فورۋمىندا رەسەي فەدەراتسياسىنىڭ پرەزيدەنتى ۆلاديمير پۋتين ايتتى، دەپ حابارلايدى kazinform.
«بۇل كۇندەرى قوستانايدا ەكى ەلدىڭ 30 دان استام ءوڭىرىنىڭ وكىلدەرى - بيلىك ورگاندارىنىڭ باسشىلارى، زاڭ شىعارۋشىلار، مينيسترلىكتەر مەن ۆەدومستۆولاردىڭ، بيزنەستىڭ، عىلىمي جانە قوعامدىق توپتاردىڭ وكىلدەرى جينالدى. ياعني، ءبىزدىڭ قارىم- قاتىناستارىمىزدىڭ بارلىق كەشەنىندە - ساياساتتا، ەكونوميكادا، گۋمانيتارلىق سالادا دامۋدىڭ پراكتيكالىق اسپەكتىلەرىمەن كۇندەلىكتى اينالىساتىندار»، - دەدى رەسەي پرەزيدەنتى.
ول قازاقستان پرەزيدەنتىنىڭ بەلسەندى جانە باستاماشىل جۇمىسىنىڭ ارقاسىندا ەكى ەلدىڭ وڭىرلەر جەلىسى بويىنشا ىنتىماقتاستىق تەرەڭدەي ءتۇسىپ، ناقتى مازمۇنمەن تولىقتىرىلاتىنىن ايتتى.
«قازىرگى ۋاقىتتا رەسەي فەدەراتسياسىنىڭ 76 ءوڭىرى قازاقستان وبلىستارىمەن تىكەلەي ارىپتەستىك بايلانىس ورناتتى. ءوڭىرارالىق ساپارلارمەن الماسۋ تۇراقتى سيپاتقا يە بولۋى دا ماڭىزدى. بيىل، اتاپ ايتقاندا، ياكۋتيا، استراحان، چەليابى وبلىستارىنىڭ باسشىلارى قازاقستاننىڭ ءارتۇرلى ايماقتارىنا وتە ناتيجەلى جۇمىس ساپارلارىن وتكىزدى. قازاقستاندىق وكىلدى دەلەگاتسيالار كراسنويارسك ەكونوميكالىق فورۋمىنا جانە بۋرياتيانىڭ 100 جىلدىعىنا ارنالعان ءىس- شارالارعا قاتىستى»، - دەدى ۆلاديمير پۋتين.
رەسەي پرەزيدەنتىنىڭ ايتۋىنشا، ايماقتىق ءوزارا ءىس- قيمىلدىڭ ناتيجەلى شارتتىق- قۇقىقتىق بازاسى ۇنەمى دامىپ، تولىقتىرىلىپ وتىرادى. ونىڭ ىشىندە ەكى ەلدىڭ ۇكىمەتتەرى اراسىندا 60 تان استام كەلىسىم بار.
«مەنىڭ بىلۋىمشە، وسى فورۋمنىڭ قورىتىندىسى بويىنشا قول قويۋعا ءبىرقاتار جاڭا كەلىسىم مەن مەموراندۋمدار، سونداي- اق جالپى سوماسى 100 ميلليون دوللارعا جۋىق كوممەرتسيالىق كەلىسىمشارتتار دايىندالدى. بۇل رەسەي- قازاقستان ەكونوميكالىق بايلانىستارىنىڭ قالاي تابىستى دامىپ كەلە جاتقانىن ايقىن كورسەتەدى. وسىعان بايلانىستى وڭىرلەردىڭ تىكەلەي بەلسەندى قاتىسۋىمەن قازاقستانمەن ءوزارا تاۋار اينالىمىمىز 2022 -جىلى 10 پايىزدان استامعا ۇلعايعانىن اتاپ وتكىم كەلەدى. ءبىزدىڭ ستاتيستيكا بويىنشا - 28,2 ميلليارد دوللار»، - دەدى ول.
