رەسەيدە قازاق ءتىلى مۇعالىمدەرىنە سۇرانىس ارتتى
استانا. قازاقپارات - رەسەيدە قازاق ءتىلى مۇعالىمىنە سۇرانىس ارتىپ كەلەدى. ماسكەۋدەگى ماماندار جالداۋ قىزمەتىنىڭ مالىمەتى بويىنشا، وتكەن جىلى قازاق تىلىنەن ساباق بەرەتىن وقىتۋشىعا دەگەن سۇرانىس %96- عا وسكەن.
ال ۋنيۆەرسيتەتتەردە ەكىنشى شەت ءتىلى رەتىندە قازاق ءتىلىن تاڭدايتىن ستۋدەنتتەر قاراسى كوبەيگەن.
ارينا بوبكوۆا - ماسكەۋ لينگۆيستيكالىق ۋنيۆەرسيتەتىنىڭ وقىتۋشىسى. التى جىل بۇرىن ول قازاق ءتىلىن ەكىنشى شەت ءتىلى رەتىندە وقي باستادى. قازاقستان تاريحى مەن مادەنيەتىنە قىزىققان ارينا رەسەيدە قازاق ءتىلىن ناسيحاتتاۋدى شەشەدى. قازىر ول قازاق ءتىلى مەن مادەنيەتى ورتالىعىندا باكالاۆرلار مەن ماگيسترلەرگە ساباق بەرەدى. ال ونىڭ وقۋشىلارى قازاق ءتىلىن مەڭگەرۋ جاڭا كاسىبي مۇمكىندىكتەرگە جول اشاتىنىنا سەنىمدى.
ارينا بوبكوۆا، ماسكەۋ مەملەكەتتىك لينگۆيستيكالىق ۋنيۆەرسيتەتىنىڭ وقىتۋشىسى:
- بۇعان دەيىن مەن التى جىل بويى قازاق ءتىلى مەن مادەنيەتى ورتالىعىندا وقىدىم. ال قازىر مەن باسقا ستۋدەنتتەرمەن وسى بىلىممەن ءبولىسىپ جاتىرمىن. بۇل جۇمىس وتە قىزىقتى. بۇل ساباقتار وتە قۇندى، سەبەبى جەكە فورماتتا وتەدى.
كاميلا ۆاليەۆا، ماسكەۋ مەملەكەتتىك لينگۆيستيكالىق ۋنيۆەرسيتەتىنىڭ ماگيسترانتى:
- مەن ماسكەۋ مەملەكەتتىك لينگۆيستيكالىق ۋنيۆەرسيتەتىنىڭ ماگيستراتۋراسىندا وقيمىن. قازاق تىلىمەن العاش رەت تانىسا وتىرىپ، وقۋ وڭاي ەمەس، ءبىراق وتە قىزىقتى بولاتىنىن ءتۇسىندىم. سوندىقتان مەن ماگيستراتۋراعا بارۋدى شەشتىم. قازىر مەن توپتا جالعىز وقيمىن، ءبىراق وعان قۋانىشتىمىن. وقۋ ناتيجەلى بولادى.
ماسكەۋ مەملەكەتتىك لينگۆيستيكالىق ۋنيۆەرسيتەتى ت م د ەلدەرىنىڭ تىلدەرىن وقىتاتىن نەگىزگى جوعارى وقۋ ورىنى. مۇندا قازاق ءتىلى مەن مادەنيەتى ورتالىعى بار. بۇل جەردە ستۋدەنتتەر قازاق ءتىلىن ۇيرەنۋ كۋرستارىندا وقىپ، كاسىبي قايتا دايارلاۋدان وتە الادى. ورتالىقتا ءتىلدى مەڭگەرۋ دەڭگەيى باعالانىپ، سەتيفيكات بەرىلەدى.
جەنيشكۋل حۋلحاچيەۆا، م م ل ۋ كافەدرا مەڭگەرۋشىسى:
- ولار قازاق ءتىلىنىڭ پراكتيكالىق كۋرسىن، سويلەۋ تاجىريبەسىن، زەرتتەيتىن ءوڭىردىڭ تاريحى مەن مادەنيەتىن، ادەبيەت تاريحىن وقيدى. 25 جىل ىشىندە قازاق ءتىلىن بىلەتىن كوپ مامان دايىنداپ شىعاردىق.
ساراپشىلار رەسەيلىك نارىققا قازاق مادەنيەتىنىڭ ەرەكشەلىكتەرىن تۇسىنەتىن، بيزنەس- سەرىكتەستەرمەن قازاق تىلىندە كەلىسسوز جۇرگىزە الاتىن ماماندار قاجەت دەيدى. ماسكەۋدە قازاق ءتىلى ماماندارىن بىرنەشە مەملەكەتتىك ۋنيۆەرسيتەتتە كاسىبي نەگىزدە دايىندايدى. ال ەڭبەك نارىعىندا مامانداردى ىزدەۋمەن اينالىساتىن ەڭ ءىرى رەسەيلىك سەرۆيستىڭ ءبىرىنىڭ مالىمەتىنە سۇيەنسەك، وتكەن جىلى ەلدە قازاق ءتىلى مۇعالىمدەرىنە سۇرانىس 96 پايىزعا ارتقان.
24.kz
