رەسەيدە جالدامالى پاتەردەن ءتورت وزبەكستاندىقتىڭ ءمايىتى تابىلدى
كالينينگراد. KAZINFORM — رەسەيدىڭ كالينينگراد قالاسىنداعى كوپقاباتتى ۇيلەردىڭ بىرىنەن ءتورت وزبەكستاندىقتىڭ ءمايىتى تابىلدى. تەرگەۋشىلەر ولاردىڭ ولىمىنەن قىلمىس بەلگىلەرىن تاپپاعان.
گاگارين كوشەسى، 22-ۇيدەگى پاتەر شامامەن ءبىر اي بۇرىن جالعا بەرىلىپ، ول جەرگە ءتورت ەر ادام كوشىپ كەلگەن. ولار كالينينگرادقا وزبەكستاننان جۇمىسقا كەلگەن.
كورشىلەرى مارقۇمدار تۋرالى وڭ پىكىرلەرىن ايتىپ، ولاردىڭ كوپ جۇمىس ىستەيتىنىن، ۇيگە سيرەك كەلەتىنىن اتاپ ءوتتى.
- ولار جاقسى ادامدار ەدى. كۇندە تاڭەرتەڭ سەگىز جارىمدا كەتىپ، كەشكى توعىزدار شاماسىندا قايتاتىن. مەن ەسىكتىڭ جابىلعان دىبىسىن عانا ەستيتىن ەدىم، ولار وتە تىنىش بولدى، - دەپ ەسكە الادى ليۋدميلا ەسىمدى ايەل.
باستاپقى بولجام بويىنشا، ولاردىڭ ولىمىنە كومىرقىشقىل گازىنان ۋلانۋ سەبەپ بولعان. وبلىستىق تەرگەۋ كوميتەتىنىڭ نۇسقاسى بويىنشا، جالدامالى پاتەردە گاز جابدىقتارىنا دۇرىس قىزمەت كورسەتىلمەگەن.
قىلمىستىق ءىستى تەرگەۋ وبلىس پروكۋراتۋراسىنىڭ باقىلاۋىندا. ولاردىڭ ولىمىنە پاتەر يەسى كىنالى بولۋى مۇمكىن. «ابايسىزدا ادام ولىمىنە اكەپ سوقتىرۋ» بابى بويىنشا قوزعالعان قىلمىستىق ءىس بويىنشا ەڭ جوعارى جازا 4 جىلعا دەيىن باس بوستاندىعىنان ايىرۋ، - دەيدى رەسەيدىڭ كالينينگراد وبلىسى بويىنشا تەرگەۋ كوميتەتى باسشىسىنىڭ اعا كومەكشىسى ناتاليا گاتسكو.
