رەسەي سوعىستا سولتۇستىك كورەيانىڭ قارۋىن پايدالانىپ جاتىر – ب ۇ ۇ
ب ۇ ۇ قاۋىپسىزدىك كەڭەسىنە مۇشە مەملەكەتتەر ۋكرايناداعى سوعىستى تالقىلاۋعا ارنالعان جيىندا رەسەيدى تاعى دا ايىپتادى.
كەڭەستىڭ مۇشەلەرى رف سولتۇستىك كورەيادان ساتىپ العان قارۋ-جاراعىن بەيبىر حالىقتى بومبالاۋ ءۇشىن پايدالانىپ جاتىر دەپ مالىمدەمە جاسادى.
«امەريكا داۋىسى» اقپارات اگەنتتىگىنىڭ حابارلاۋىنشا، سوڭعى ەكى اپتادا كيەۆ، لۆوۆ، حاركوۆ، حمەلنيتسكي، دنەپر، سۋمى، چەركاسى، ودەسسا مەن زاپوروجە وبلىستارىندا جۇزدەگەن ادام زارداپ شەككەن. قازا تاپقان ادامدار دا بار. سوققىنىڭ كەسىرىنەن ادام كوپ شوعىرلانعان تۇرعىن ۇيلەر، مەديتسينا مەكەمەلەرى مەن ۆوكزالدار قيراعان. قازىر رەسەيدىڭ سوققىسىنان ەلدىڭ 40 پايىز حالقى گۋمانيتارلىق كومەككە ءزارۋ بولىپ وتىر. ميلليونداعان ادام ەلدەن بوسىپ كەتكەن.
كەزدەسۋدە رەسەيدىڭ بۇۇ- داعى وكىلى ۆاسيليي نەبەنزيا سوعىستان ميلليونداعان ادامنىڭ بوسىپ كەتىپ، بەيبىت حالىقتىڭ زارداپ شەگىپ جاتقانىن جوققا شىعارمادى. سونىمەن بىرگە ول ءوز ەلىنىڭ ۋكراينادا سولتۇستىك كورەيا زىمىراندارىنىڭ قولدانىلعانىن دا راستادى.
ب ۇ ۇ- نىڭ ادام قۇقىعى جونىندەگى جوعارى كوميسسارىنىڭ مالىمەتىنە قاراساق، ۋكراينادا سوعىس باستالعالى بەرى 10242 ادام قازا تاپقان. ونىڭ ىشىندە 575 بالا بار. 19337 ادام جاراقات العان. 1264 بالا دا جاراقاتتانعان. ءبىراق بەيرەسمي دەرەكتە قازا تاپقان حالىقتىڭ سانى بۇدان 10 ەسە كوپ.
جاقىندا ا ق ش سولتۇستىك كورەيا رەسەيگە تاكتيكالىق راكەتا كەشەندەرىن تاسىمالداعانىن، بالليستيكالىق راكەتالاردىڭ 30- جەلتوقسان مەن 2- قاڭتار ارالىعىندا ۋكرايناعا جاپپاي سوققى جاساعان كەزدە پايدالانىلعانىن ەسكەرتتى.
وڭتۇستىك كورەيانىڭ ب ۇ ۇ- داعى وكىلى رەسەي سولتۇستىك كورەيا راكەتالارىن پايدالانسا، ك ح د ر- دىڭ كورەيا رەسپۋبليكاسىمەن سوعىسقا دايىندالىپ جاتقانىن ايتتى.
كورەيا ساراپشىلارىنىڭ پىكىرىنشە، رەسەي ۋكراينادا ك ن-23 تاكتيكالىق زىمىراندارىن پايدالانادى.
