رەسەي، قىتاي جانە ءۇندىستان جاساندى ينتەللەكت سالاسىندا كۇش بىرىكتىرۋدە
استانا. قازاقپارات - رەسەي، قىتاي جانە ءۇندىستان جاساندى ينتەللەكت (ج ي) سالاسىندا بىرلەسىپ جۇمىس ىستەۋ ءۇشىن بريكس+ اليانسىن قۇردى. بۇل تۋرالى الەمدىك ب ا ق بەلسەندى تۇردە جازىپ جاتىر.
اليانستىڭ ۇيلەستىرۋشىسى رەتىندە رەسەيدىڭ سبەر بانكى تاڭدالعان. سبەر قازىردىڭ وزىندە شانحايمەن سەرىكتەستىك سەكىلدى بىرنەشە حالىقارالىق جوبالاردى باستاپ كەتتى.
ساراپشىلاردىڭ ايتۋىنشا، اليانستىڭ بىرىككەن تەحنولوگيالىق قۋاتى مەن رەسۋرستارى باتىس ەلدەرىنىڭ ج ي سالاسىنداعى بارلىق جەتىستىكتەرىن باسىپ وزۋى مۇمكىن. اليانس قۇرامىنا كىرەتىن ەلدەردىڭ ءىرى عىلىمي- زەرتتەۋ ورتالىقتارى، وزىق تەحنولوگيالارى جانە قوماقتى ينۆەستيتسيالارى بىرلەسە وتىرىپ، ج ي سالاسىندا جاڭا دەڭگەيگە شىعۋعا مۇمكىندىك بەرەدى.
بريكس+ اليانسىنىڭ نەگىزگى ماقساتى - جاساندى ينتەللەكت تەحنولوگيالارىن دامىتۋدا سەرىكتەستىك ورناتىپ، ءبىلىم جانە تاجىريبە الماسۋ. بىرلەسكەن جوبالار اياسىندا دەرەكتەردى وڭدەۋ، نەيروندىق جەلىلەردى دامىتۋ، جانە ج ي قوسىمشالارىن قولدانۋ سالاسىندا جاڭا مۇمكىندىكتەر اشىلماق.
بۇل باستاما تەك ەكونوميكالىق ەمەس، ساياسي تۇرعىدا دا ۇلكەن ماڭىزعا يە. جاڭا اليانس ج ي سالاسىنداعى الەمدىك كوشباسشىلىق ءۇشىن ۇلكەن باسەكەلەستىك تۋدىراتىنى انىق.
