رەسەيگە قۇيعان ينۆەستيتسيا 6 ميلليارد دوللارعا جۋىقتادى - پرەزيدەنت سۇحباتىنان

ودان بولەك، ەكى ەلدىڭ بيزنەس سۋبەكتىلەرى جالپى سوماسى 33,5 ميلليارد دوللار بولاتىن 143 بىرلەسكەن جوبانى قولعا الدى. بۇل تۋرالى ق ر پرەزيدەنتى قاسىم-جومارت توقايەۆتىڭ رەسەيلىك «يزۆەستيا» گازەتىنە بەرگەن سۇحباتتا ايتىلدى، دەپ حابارلايدى Kazinform.

«ينۆەستيتسيالىق ىنتىماقتاستىق تۋرالى ساۋالىڭىزعا وراي مىنا نارسەنى ايتقىم كەلەدى. سوڭعى 18 جىلدا رەسەيدەن قازاقستانعا كەلگەن تىكەلەي ينۆەستيتسيانىڭ جالپى كولەمى 20 ميلليارد دوللاردان استى. ءوز كەزەگىندە، قازاقستاننىڭ رەسەيگە قۇيعان ينۆەستيتسياسى 6 ميلليارد دوللارعا جۋىقتادى. ينۆەستيتسيالىق ىقپالداستىقتىڭ وسىلايشا وڭ قارقىن الۋىنا وندىرىستىك كووپەراتسيانىڭ دا سەپتىگى ءتيدى»، - دەپ جاۋاپ بەردى مەملەكەت باسشىسى سۇحبات ساۋالىنا.

قاسىم-جومارت توقايەۆ تۇسىندىرگەندەي ەكى ەلدىڭ بيزنەس سۋبەكتىلەرى جالپى سوماسى 33,5 ميلليارد دوللار بولاتىن 143 بىرلەسكەن جوبانى جۇزەگە اسىرىپ جاتىر.

«جالپى سوماسى 3,2 ميلليارد دوللار بولاتىن 30 ماڭىزدى جوبا ءساتتى ىسكە قوسىلدى. قازىرگى كەزدە ماشينا جاساۋ، مەتاللۋرگيا جانە حيميا ونەركاسىبى سەكىلدى ەكونوميكانىڭ ماڭىزدى سالالارىندا 40 جوبا جۇزەگە اسىرىلۋدا. ولاردىڭ جالپى قۇنى 16,6 ميلليارد دوللاردى قۇرايدى ءارى 15 مىڭنان استام ادامدى جۇمىسپەن قامتيدى. ءبىر سوزبەن ايتقاندا، قازاقستان-رەسەي ىنتىماقتاستىعىن دامىتۋ ءۇشىن بۇل باعىتتا مول الەۋەت بار»، - دەپ تولىقتىردى پرەزيدەنت.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى