رەسەي قازاقستان اۋماعى ارقىلى 100 ميلليون توننا مۇنايىن قىتايعا ەكسپورتتاماق
استانا. KAZINFORM - ءماجىلىس رەسەي مۇنايىن قازاقستان ارقىلى قىتايعا تاسىمالداۋ كەلىسىمىنە ەنەتىن وزگەرىستەردى ماقۇلدادى.
«جوعارىدا اتالعان كەلىسىمگە 2013 -جىلعى 24-جەلتوقساندا قول قويىلدى جانە 2014 -جىلعى شىلدەدە كەلىسىم شارتتارى مەن تاراپتاردىڭ ۋاعدالاستىقتارىنا سايكەس راتيفيكاتسيالاندى.
تاراپتار كەلىسىمدى 2024 -جىلدان 2033 -جىلعا دەيىن ۇزارتۋعا ءوزارا مۇددەلىلىك ءبىلدىردى جانە 2013 -جىلى قول قويىلعان كەلىسىمگە وزگەرىستەر ەنگىزۋ بويىنشا ءتيىستى كەلىسسوزدەرگە كىرىستى.
2014 -جىلدان 2023 -جىلعا دەيىنگى كەزەڭدە رەسەي مۇنايىنىڭ ق ر اۋماعى ارقىلى ق ح ر- عا جالپى ترانزيتى 90 ميلليون 899 مىڭ 271 توننانى قۇرادى. جالپى ءتۇسىم 1 ميلليارد 327 ميلليون دوللار نەمەسە 501 ميلليارد 981 ميلليون 476 مىڭ 65 تەڭگەنى قۇرادى»، - دەدى الماسادام ساتقاليەۆ.
ءمينيستردىڭ سوزىنە قاراعاندا، رەسەي تاراپى الداعى 10 جىلدا 100 ميلليون توننا مۇناي جەتكىزۋ تۋرالى كەلىسىمدى ۇزارتىپ، قول قويعانىن حابارلاپ وتىر.
«كەلىسسوزدەردىڭ قورىتىندىسى 2023 -جىلعى 16-ماۋسىمدا سانكت- پەتەربۋرگ قالاسىندا كەلىسىمگە وزگەرىستەر ەنگىزۋ تۋرالى قول قويىلعان حاتتاما بولدى.
كەلىسسوزدەر كەزىندە تون-2 مارشرۋتىنىڭ ۋچاسكەسىن كەلىسىمگە ەنگىزۋ جانە «تونناسىنا 2 دوللار» تاريفىن بەلگىلەۋ ۇسىنىلدى. جوعارىدا اتالعان بارلىق ءوزارا ۇسىنىستار تاراپتار اراسىندا كەلىسىلدى.
كەلىسىمدى ۇزارتۋ پاۆلودار مۇناي-حيميا زاۋىتىنان ومبى-پاۆلودار مۇناي قۇبىرى ارقىلى قازاقستانعا تۇسەتىن مۇنايمەن جۇكتەۋدى قامتاماسىز ەتەدى. ەشقانداي تاۋەكەلدەر جوق.
2024 -جىلدان 2033 -جىلعا دەيىنگى كەزەڭدە ەكى ۋچاسكە بويىنشا ق ر اۋماعى ارقىلى ق ح ر- عا رەسەي مۇنايىنىڭ ترانزيتىنەن كۇتىلەتىن ءتۇسىم - 1 ميلليارد 851 ميلليون دوللار. ال الماستىرۋدان تۇسكەن پايدانى ەسكەرسەك، ءتۇسىم كولەمى 1 ميلليارد 710 ميلليون دوللار بولادى»، - دەدى ەنەرگەتيكا ءمينيسترى.
اۆتور
ەسىمجان ناقتىباي
