رەسەي بيلىگى ءۇي شارۋاسىنداعى ايەلدەرگە بيۋدجەتتەن اقى تولەۋدى قاراستىرىپ جاتىر

رەسەي مەملەكەتتىك دۋماسىنىڭ ەڭبەك، الەۋمەتتىك ساياسات جانە ارداگەرلەر ىستەرى جونىندەگى كوميتەتىنىڭ ءتوراعاسى ياروسلاۆ نيلوۆ (ل د پ ر) ءۇي شارۋاشىلىعىمەن اينالىساتىن ازاماتتارعا ەڭ تومەنگى كۇنكورىس دەڭگەيىندە جاردەماقى تولەۋدى ۇسىندى. بۇل تۋرالى تاسس قۇجات ماتىنىنە سىلتەمە جاساپ حابارلادى.
زاڭ جوباسى تەك ءۇي شارۋاسىمەن اينالىساتىن ازاماتتارعا قاتىستى. ءۇي جۇمىستارىنىڭ قاتارىنا:

تاماق ازىرلەۋ؛
كىر جۋۋ؛
تىگىن تىگۋ، توقۋ، كيىم مەن اياق كيىمگە كۇتىم جاساۋ؛
پاتەر تازالاۋ؛
ازىق-تۇلىك، تاۋارلار مەن قىزمەتتەر ساتىپ الۋعا جۇمسالاتىن ۋاقىت؛
1,5 جاستان اسقان بالالارعا، مۇگەدەك بالالارعا، بالا كەزىنەن I توپ مۇگەدەكتەرىنە كۇتىم جاساۋ؛
مەديتسينالىق مەكەمەنىڭ قورىتىندىسى بويىنشا تۇراقتى كۇتىمدى قاجەت ەتەتىن قارت اتا-انالارعا قاراۋ كىرەدى.
اي سايىنعى تولەم جۇمىسقا قابىلەتتى ازاماتتىڭ ەڭ تومەنگى كۇنكورىس دەڭگەيىنە تەڭ بولادى، 2025 -جىلى بۇل سوما 19329 رۋبل بولادى.

سونىمەن قاتار، جاردەماقى تەك وتباسىنىڭ جان باسىنا شاققانداعى ورتاشا تابىسى ايماقتا بەلگىلەنگەن كۇنكورىس مينيمۋمىنىڭ ەكى ەسەلەنگەن مولشەرىنەن اسپاعان جاعدايدا عانا بەرىلەدى.

قۇجاتتا كورسەتىلگەندەي، تولەم التى اي مەرزىمگە تاعايىندالادى. وسى ۋاقىت وتكەن سوڭ، ازامات جاڭا ءوتىنىش بەرىپ، قاجەتتى قۇجاتتاردى قايتا تاپسىرا الادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى