ەرمۇرات باپي «وتاعاسى تۋرالى» زاڭ قابىلداۋدى ۇسىندى
استانا. KAZINFORM - بۇگىن ءماجىلىستىڭ جالپى وتىرىسىندا دەپۋتات ەرمۇرات باپي «وتاعاسى تۋرالى» زاڭ قابىلداۋدى ۇسىندى.
ايتا كەتەيىك، جالپى وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭىنىڭ جوباسى ءبىرىنشى وقىلىمدا تالقىلانىپ جاتىر. زاڭ جوباسى تۋرالى نەگىزگى باياندامانى ءماجىلىس دەپۋتاتى جۇلدىز سۇلەيمەنوۆا جاسادى. وسىعان وراي ەرمۇرات باپي ارىپتەسىنەن زاڭ جوباسىنىڭ اۆتورى رەتىندە «وتاعاسى تۋرالى» زاڭ قابىلداۋعا قاتىستى پىكىرىن سۇراعان ەدى.
«وسى زاڭ جوباسىندا اكەنىڭ، ەر-ازاماتتىڭ ءرولىن سۇمىرەيتىپ جىبەرگەن جوقپىز با؟ وسى جونىندە ءسىزدىڭ زاڭ جوباسىنىڭ اۆتورى رەتىندە جەكە پىكىرىڭىزدى بىلگىم كەلەدى. زاڭ جوباسى نەگىزىندە قازاقستاندىق مۇددەنى قورعايدى. بۇل جەردە اناۋ-مىناۋ، ۇلىس دەگەن جوق. ءبىراق، ءبىزدىڭ نازاردان شىعارمايتىن ءبىر ماسەلە بار. قازاقستان حالقىنىڭ 70 پايىزدان استامىن قازاق قۇرايتىنىن بىلەمىز. وسى تۇرعىدان كەلگەندە مىنا جەردە وتىرعانداردىڭ كوپشىلىگى «اكەڭ كەلە جاتىر»، «اكەڭ كەلسىن»، «اكەڭ سازايىڭدى بەرەدى» دەگەن تاربيەمەن وستىك قوي. وسى تۇرعىدان كەلگەندە اكەنىڭ، ەر-ازاماتتىڭ ءرولىن كوتەرۋ ءۇشىن بالكىم «وتاعاسى تۋرالى» زاڭ قابىلداۋىمىز كەرەك شىعار؟! ءسىزدىڭ ءوز ويىڭىز قانداي؟»، - دەپ سۇرادى ەرمۇرات باپي.
جۇلدىز سۇلەيمەنوۆانىڭ اتاپ وتۋىنشە، اكەنىڭ وتباسىنداعى ءرولى دە، ورنى دا قازاق تاربيەسىندە ەرەكشە.
«ءبىز ەگەر ۇلت جانە ۇلت بولاشاعى دەسەك، وندا اكە دەگەن سوزبەن ولاردىڭ تۇگەل بايلانىسىپ، ساباقتاسىپ جاتقانىن جاقسى بىلەمىز. ءبىراق، ءبىز بۇل زاڭمەن «ءبىر قولىمەن بەسىكتى، ءبىر قولىمەن الەمدى تەربەتكەن» ايەلدىڭ بۇگىنگى تاڭداعى تۇرمىستىق قارىم-قاتىناستاعى پاتريارحالدىق وزبىرلىقا ۇشىراۋىنا بەلگىلى ءبىر توسقاۋىل قوياتىن باپتاردى ەنگىزىپ وتىرمىز. ءيا، مەندە ءسىز سەكىلدى اكەلەردىڭ، ەر-ازاماتتاردىڭ، بالالارىمىزدىڭ بولاشاعىنا قاتىستى وي-پىكىرىم بار. ويتكەنى، ءبىز ەلدىڭ بولاشاعىن ۇلدىڭ بولاشاعىمەن بايلانىستىرعان حالىقپىز. دەگەنمەن، كونستيتۋتسيانىڭ 33-بابىندا جىنىسقا بولمەي، ايەل مەن ەر-ازاماتتىڭ گەندەرلىك تەڭدىگى ناقتى كورسەتىلگەن. ەگەر اكەلەردىڭ ءرولىن، وتباسىنداعى جالپى جاۋاپكەرشىلىگىن، بالا تاربيەسىندەگى ەرەكشە ورنىن بەلگىلەيتىن زاڭ قاجەت بولسا، ءبىرىنشى بولىپ ازىرلەۋگە، ءبىرىنشى بولىپ قابىلداۋعا جانە ونىڭ ورىندالۋىنا انا رەتىندە، وسى ەلدىڭ قىزى رەتىندە اتسالىسقىم كەلەدى»، - دەدى ءماجىلىس دەپۋتاتى.
وسى ورايدا ءماجىلىس ءتوراعاسى ەرلان قوشانوۆ دەپۋتات ەرمۇرات باپيگە قاراتا: «ەرمۇرات سەيىتقازى ۇلى، ەگەر وتاعاسى ءجابىر كورىپ جاتسا، ونى دا قورعايتىن زاڭ بۇل. بارىنە بىردەي»، - دەپ ازىلدەدى.
