ەرمۇرات باپي ۇلتتىق قوردان بانكتەرگە بەرىلگەن قارىز ماسەلەسىن كوتەردى
ۇلتتىق قوردان ساۋىقتىرۋ ءۇشىن بانكتەرگە بەرىلگەن قارىزدى قايتارۋدى تالاپ ەتۋ كەرەك. بۇل تۋرالى ماجىلىستە «حالىقتىڭ شامادان تىس كرەديت الۋىن ازايتۋ جانە قارجىلىق ساۋاتتىلىقتى ارتتىرۋ» تاقىرىبىنداعى پارلامەنت تىڭداۋىندا ەرمۇرات باپي ايتتى، دەپ حابارلايدى Kazinform.
«حالىقتىڭ قارىزى بويىنشا ەكى ماسەلەنى كوتەرمەكپىن. بىرىنشىدەن، «ەسكى قازاقستاننىڭ» حالىق الدىنداعى قارىزىن نەگە ىزدەمەيسىزدەر؟ ساۋىقتىرامىز دەپ ۇلتتىق قوردان بانكتەرگە بەرىلگەن تريلليونداعان تەڭگە قارىزدى قايتارۋدى نەگە تالاپ ەتپەيسىزدەر؟ ساۋىقتىرامىز دەپ كەزىندە ولارعا اقشا اۋدارىلدى عوي»، - دەدى ە. باپي باس پروكۋراتۋرا وكىلدەرىنە قاراتا ايتقان سوزىندە.
ونىڭ پايىمىنشا، بىرنەشە بانكتى بىرىكتىرىپ، قىرۋار ساۋىقتىرۋ قارجىسىن ءبىر بانككە جيناستىرىپ، ونىڭ بارلىعىن الىپ كەتكەن وليگارحتارعا تيەسىلى بانكتەردىڭ قارىزىن ىزدەۋ كەرەك.
«ەگەر سول تريلليوندار قايتارىلاتىن بولسا، حالىقتىڭ قازىرگى كرەديت قارىزىن ون نەمەسە جيىرما ەسە جاۋىپ تاستاۋعا بولار ەدى. بىرىنشىدەن، اكتيۆتەردى ەلگە قايتارامىز دەپ زاڭ قابىلدادىق قوي. سول زاڭنىڭ ورىندالىپ جاتقانى قايدا؟ ۋاكىلەتتى ورگان قۇرۋ جونىندە وتكەندە حابار بولدى. ءبىراق ول حابار ماردىمسىز. سول اكتيۆتەردى قايتارۋ كوميتەتىنە 130 ادامنان قۇرالعان شتات بولادى دەپ ەدى. قازىر 30-40 ادام دەپ قانا تۇر. ناقتى كوميتەتتە قانشا ادام بار ەكەنىن ايتساڭىزدار؟ ۇكىمەتكە سۇراق: كوميسسيانىڭ قۇرامىندا ازاماتتىق قوعام وكىلدەرىنەن كىمدەر بار؟» - دەپ سۇرادى دەپۋتات.
ءوز كەزەگىندە باس پروكۋروردىڭ ورىنباسارى جاندوس ومىراليەۆ 5- قازاندا مەملەكەت باسشىسىنىڭ جارلىعىمەن كوميتەت قۇرىلعانىن ەسكە سالدى.
«ونىڭ شتاتى دا قۇرىلدى. بارلىق ءنورماتيۆتى اكت بار. 900 ميلليارد تەڭگەدەن استام قاراجاتتى مەملەكەتتىڭ پايداسىنا قايتاردىق. 600 ميلليون دوللار مەملەكەتتەن سىرتتان اۋدارىلدى. اۋقىمدى جۇمىس ءالى دە جالعاسىپ جاتىر. ونىڭ ىشىندە كوپتەگەن جەر تەلىمى قايتارىلدى. ارينە، كوميسسيانىڭ ناقتى رەەسترى جانە ونىڭ قۇرامى بار. وعان پارلامەنت دەپۋتاتتارى جانە قوعامداعى بەلسەندى ازاماتتار كىردى. ولاردىڭ اتى-ءجونىن سىزگە جەكە بەرەمىن. كوميتەتتىڭ رەەسترىنە بىرلەسە وتىرىپ شەشىم قابىلداندى. ونىڭ ىشىندە ءبىزدىڭ قۇقىقتىق، ينۆەستورلىق جانە تاعى باسقا الەۋمەتتىك ماسەلەلەردى ەسكەرىپ، ناقتى رەەسترگە قاي ادامداردىڭ كىرگەنىنە قاتىستى ماسەلە ءالى جابىق. ءبىراق بۇل جۇمىس جالعاسىپ جاتىر. ەگەر زاڭسىزدىق انىقتالسا، وسى رەەسترگە ناقتى كىرگەن تۇلعالارعا قاتىستى شەشىم جاريا ەتىلەدى. ماسەلەن، ينۆەستور ءبىرىنشى كەزەكتە ءوزىنىڭ قۇقىعىن قورعاۋ كەرەك قوي. ءبىز دە ونىڭ قۇقىعىن قورعاۋىمىز كەرەك. سوندىقتان كەمشىلىكتەر مەن زاڭسىزدىقتار انىقتالعان جاعدايدا عانا ول رەسمي تۇردە جاريالانادى»، - دەدى ج. ومىراليەۆ.
بۇعان دەيىن حابارلانعانداي، اكتيۆتەردى قايتارۋ ءتارتىبى جايىندا ادىلەت ۆيتسە-ءمينيسترى الما مۇقانوۆا تۇسىندىرگەن ەدى.
قازاقستاندا زاڭسىز الىنعان اكتيۆتەردى قايتارۋ جونىندەگى كوميسسيا قۇرىلدى. جاقىندا ق ر پرەمەر-ءمينيسترى ءاليحان سمايىلوۆتىڭ توراعالىعىمەن اتالعان كوميسسيانىڭ ءبىرىنشى وتىرىسى دا ءوتتى.
