ەرمەك مۇساينوۆ: قارسىلاستاردىڭ دەڭگەيى جوعارى، نامىستى قولدان بەرمەۋگە تىرىسامىز

مۇساينوۆ بۇگىنگى فيليپپينمەن ويىن تارتىستى وتكەنىن ايتتى.

- ويىن وتە قيىن جانە تارتىستى ءوتتى. الايدا، قارسىلاستىڭ شەبەرلىگى باسىم بولدى. ءبىز ويىن تىزگىنىن ءوز قولىمىزعا الۋعا تىرىستىق. جاقسى ويىن كورسەتتىك، ءبىز جەڭىلگەن جوقپىز، نامىستى قولدان بەرمەدىك. ەندى مىقتى بولىپ ورالامىز دەپ ويلايمىن، - دەدى سپورتشى.

ەرمەك مۇساينوۆتىڭ ايتۋىنشا، حاربيندەگى قىسقى ازيادا ونىڭ العاشقى حالقارالىق دەڭگەيدەگى جارىسى.

- نەگىزى مەن قۇرامامەن العاش رەت حالقارالىق دەڭگەيدەگى ءىرى جارىسقا قاتىسىپ وتىرمىن. سوندىقتان پسيحولوگيالىق جاعىنان قيىنداۋ بولدى. الايدا، كوماندانىڭ قولداۋى ماعان كۇش بەردى، وزىمە دەگەن سەنىمىمدى ارتتىردى، - دەيدى ول.

سپورتشى قۇرامانىڭ الداعى ويىندارى تۋرالى ايتىپ، پلەي-وففقا شىعۋ مۇمكىندىگىن اتادى.

- كەلەسى جولى ەڭ مىقتى قارسىلاستاردىڭ ءبىرى وڭتۇستىك كورەيامەن وينايمىز. ءبىز ءۇشىن وڭاي بولمايتىنى انىق. الايدا، ءار ويىنعا جاۋاپكەرشىلىكپەن قاراپ، بار كۇشىمىزدى سالامىز. ودان كەيىن قىرعىزستان قۇراماسى بار. پلەي-وففقا شىعۋ ءۇشىن بىزگە ءبىر جەڭىس كەرەك، - دەدى ەرمەك.

سوڭىندا سپورتشى قازاقستاندىقتارعا سالەم جولداپ، قولداۋ سۇرادى.

- بارشا قازاقستاندىقتارعا دۇعاي سالەم جولدايمىز. ءبىزدى قولداپ، بىزگە جانكۇيەر بولىڭىزدار. سىزدەردىڭ قولداۋلارىڭىز ءبىز ءۇشىن وتە ماڭىزدى، - دەيدى ەرمەك مۇساينوۆ.

ايتا كەتەيىك، كەرلينگتەن قازاقستان ەرلەر قۇراماسى قىسقى ازيا ويىندارىنىڭ العاشقى ويىنىندا قىتايلىق تايبەيدى 10:5 ەسەبىمەن جەڭدى.

بۇگىن، ەل قۇراماسى فيليپپينمەن سىنعا ءتۇسىپ، 1:4 ەسەبىمەن جول بەردى. جىگىتتەر العاشقى 7 كەزەڭدە لايىقتى قارسىلىق كورسەتكەنىمەن، فيليپپين قۇراماسى سوڭعى كەزەڭدە 2 ۇپاي ەنشىلەپ كەتتى.

وسىعان دەيىن حابارلاعانىمىزداي، قىزدار قۇراماسى قىتايلىق تايبەيدى 14:0 ەسەبىمەن قاپى قالدىردى.

اۆتور مۇحتار قاليموللا ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى