گەرمانياداعى بارلىق Volkswagen زاۋىتتارى 2 - جەلتوقساننان باستاپ جۇمىسىن توقتاتادى
استانا. قازاقپارات - VW باسشىلىعى جۇمىستان بوساتۋ جانە جۇمىسشىلاردىڭ جالاقىسىن قىسقارتۋ جوسپارلارىنان باس تارتپاعاندىقتان، كاسىپوداق كونسەرننىڭ زاۋىتتارىندا ەرەۋىلدەر وتكىزۋگە نيەتتى، دەپ جازادى DW.
گەرمانيانىڭ IG Metall كاسىپوداق ۇيىمى Volkswagen اۆتوكونسەرنىنىڭ قىزمەتكەرلەرىن 2- جەلتوقسان، دۇيسەنبىدە بارلىق VW زاۋىتتارىندا باستالاتىن جالپى ۇلتتىق ەسكەرتۋ ەرەۋىلىنە شاقىردى. بۇل تۋرالى جەكسەنبى، 1-جەلتوقساندا تومەنگى ساكسونيا فەدەرالدى شتاتىنداعى IG Metall ايماقتىق كەڭسەسىنىڭ باسشىسى تورستەن گرەگەر (Thorsten Gröger) مالىمدەدى.
جەكسەنبىگە، 1-جەلتوقسانعا قاراعان ءتۇنى Volkswagen (VW) اۆتوكونسەرنىنىڭ جۇمىسشىلارى مەن باسشىلىعى اراسىنداعى ەڭبەك داۋلارىن بەيبىت جولمەن شەشۋگە مىندەتتەيتىن كەلىسىمنىڭ مەرزىمى اياقتالدى.
- ءبىز كەلىسسوزدەر ۇستەلىندە ىمىراعا كەلۋگە دايىن ەكەنىمىزدى كورسەتتىك، ءبىراق ءبىزدىڭ ۇسىنىسىمىز قابىلدانبادى. ەندى كومپانيا نازاردان تىس قالدىرا المايتىن ەرەۋىلدەر بولادى. جاقىن ارادا بارلىق زاۋىتتاردا ءوندىرىس ۋاقىتشا توقتاتىلادى، - دەدى كاسىپوداق وكىلى.
جالاقى بويىنشا كەلىسسوزدەر 9 - جەلتوقساندا جالعاسادى دەپ جوسپارلانعان.
Volkswagen گەرمانيادا 10 زاۋىتتى باسقارادى، ونىڭ التاۋى تومەنگى ساكسونيادا، ۇشەۋى ساكسونيادا جانە بىرەۋى گەسسەندە. گەرمانياداعى كونسەرن زاۋىتتارىندا شامامەن 120 مىڭ ادام جۇمىس ىستەيدى، ولاردىڭ جارتىسىنا جۋىعى ۆولفسبۋرگتە.
