گەرمانيادا پالەستينانى قولداعان مىڭداعان ادام نارازىلىققا شىقتى

نارازى توپ گازا سەكتورىنا ءيزرايلدىڭ وق جاۋدىرۋىن توقتاتۋدى تالاپ ەتتى. Kazinform بۇل تۋرالى DW باسىلىمىنا سىلتەمە جاساپ حابارلايدى.

سەنبى، 4-قاراشادا پالەستينا تۋى مەن پالەستينانى جاقتاپ ۇرانداتقان پلاكات ۇستاعان مىڭداعان ادام الەكساندەرپلاتس الاڭىنا جينالدى. پلاكاتتاردا “گازاداعى گەنوتسيدتى توقتاتىڭدار”، “From the river tot he sea - we demand equality" (اعىلشىن تىلىنەن اۋدارعاندا “وزەننەن تەڭىزگە دەيىن - ءبىز تەڭدىكتى تالاپ ەتەمىز”، يوردان وزەنى مەن جەرورتا تەڭىزى ايتىلىپ تۇر) دەگەن سىندى جازۋلار بولدى. نارازىلىققا شىققان توپ گازا سەكتورىنا يزرايلدىك شابۋىلدى توقتاتۋدى تالاپ ەتتى.

پوليتسيا باعالاۋىنشا، جەرگىلىكتى ۋاقىتپەن 16:00 شاماسىندا اكسياعا قاتىسقاندار سانى 6 مىڭ ادام بولعان. پوليتسيا وكىلىنىڭ سوزىنشە، كەي قاتىسۋشىلاردىڭ جەكە دەرەكتەرى تەكسەرىلگەن، ال بيلىك جارلىعىن بۇزعان پلاكاتتار بويالىپ، تارتىپ الىنعان. نارازىلىق قاتاڭ جاعدايدا ءوتتى.

- ءيزرايلدىڭ تىرشىلىك ەتۋ قۇقىن جوققا شىعاراتىن كەز كەلگەن ادام قىلمىس جاساعان بولىپ سانالادى جانە دەرەۋ جازالانادى، - دەپ ەسكەرتتى اكسيا الدىندا پوليتسيا كونتينگەنتى وكىلى شتەفان كاتتە (Stephan Katte) .

سونىمەن قاتار، پوليتسيا دەرەگىنشە، انتيسەميستىك، انتييزرايلدىك جانە لاڭكەستىك پەن كۇش كورسەتۋدى ناسيحاتتايتىن كەز كەلگەن پىكىرگە تىيىم سالىندى.

بۇدان دا كوپ ادام قاتىسقان اكسيا گەرمانيانىڭ باتىسىندا، ديۋسسەلدورفتا ءوتتى. پوليتسيا اقپاراتى بويىنشا، وعان 17 مىڭعا جۋىق ادام قاتىسقان. جاقىندا وسىنداي اكسيا ەسسەن قالاسىندا دا بولدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى