گەرمانيادا 46 ميلليون ادام جۇمىس ىستەيدى، تاعى 749 مىڭ جۇمىسشى كەرەك
بىرىككەن گەرمانيادا جۇمىسشىلار سانى بۇرىن- سوڭدى قازىرگىدەي جوعارى بولماعان: 46 ميلليون ادام.
بۇل - رەكورد. بىلتىرعى جىلمەن سالىستىرعاندا گەرمانيا فەدەراتيۆتىك رەسپۋبليكاسىندا ەڭبەك ەتەتىندەر سانى 291 مىڭ ادامعا ارتتى. Kazinform بۇل تۋرالى DW باسىلىمىنا سىلتەمە جاساپ حابارلايدى.
جۇمىسپەن قامتۋ ودان دا كوپ بولۋى مۇمكىن، سەبەبى قازىر ەلدە 749 مىڭ بوس جۇمىس ورنى بار.
نەمىس جۇمىس بەرۋشىلەرى ورتاشا ەسەپپەن بەس ايدان بەرى لايىق ۇمىتكەردى ىزدەپ جاتىر، شەتەلدىك ماماندار دا قاراستىرىلادى. اسىرەسە دەنساۋلىق ساقتاۋ، قۇرىلىس جانە، ارينە، IT يندۋستريا ماماندارى قاجەت. ەلدە كولىك جۇرگىزۋشى مەن تاربيەشىلەر جەتىسپەيدى.
بۇل - شەتەلدىكتەر ءۇشىن جاقسى جاڭالىق. سەبەبى گەرمانيا ەكونوميكاسى ءبىر ورىندا تۇرىپ قالعانىنا قاراماستان وندا جۇمىس تابۋ مۇمكىندىگى جوعارى. ەل ۇكىمەتى قازىر شەتەلدىكتەردى تارتۋدى كوزدەپ وتىر. بيلىك وكىلدەرى ەلدە تۇراتىن جانە وسى جەردەن پانا سۇراعان شەت ەل ازاماتتارىنىڭ جۇمىسقا ورنالاسۋ شارتتارىن جەڭىلدەتكەن. مۇندا ءتىپتى دەپورتاتسيانى سوزا تۇرۋدى سۇراعان ادامداردى دا جۇمىسقا الۋعا رۇقسات بەرىلدى. ولاردىڭ سانى شامامەن 225 مىڭ ادام.
