گەرمانيادا 300 جولاۋشىسى بار جۇردەك پويىز جۇك كولىگىمەن سوقتىعىستى
استانا. KAZINFORM - وقيعا گامبۋرگ-حاربۋرگ-ماشەن (تومەنگى ساكسونيا) تەمىرجول ۋچاسكەسىندە بولدى، دەپ حابارلايدى BILD.
Deutsche Bahn كومپانياسىنىڭ ICE جۇردەك پويىزى شۇعىل تەجەلگەنىنە قاراماستان جوعارى جىلدامدىقپەن جۇك كولىگىنە سوعىلدى.
ءورت ءسوندىرۋ قىزمەتى وكىلىنىڭ ايتۋىنشا، كەم دەگەندە ەكى ادام زارداپ شەكتى. باسقا اقپارات قۇرالدارى جاراقات العانداردىڭ سانى كوبىرەك بولعانىن، سونىڭ ىشىندە جۇك كولىگىنىڭ جۇرگىزۋشىسى دە بار ەكەنىن، كەم دەگەندە ءبىر ادام اۋىر حالدە جاتقانىن حابارلادى.
وقيعا ورنىندا قۇتقارۋ قىزمەتى، ونىڭ ىشىندە جەدەل جاردەم تىكۇشاعى جۇمىس ىستەپ جاتىر.
جول اپاتى گامبۋرگتىڭ رەننەنبۋرگ اۋدانىندا بولعان. اپات ورنىندا سىنىقتار كوپ، جۇك كولىگى قاتتى زاقىمدانعان.
Hamburger Abendblatt باسىلىمىنىڭ حابارلاۋىنشا، پويىز جاقىنداعان كەزدە جۇك كولىگىنىڭ ارتقى جاعى رەلستە بولعان دەپ بولجانىپ وتىر. سونداي-اق جۇك كولىگىنىڭ تەمىرجول بولشەكتەرىن شىعاراتىن كومپانياعا تيەسىلى ەكەنى حابارلاندى.
باسىلىمنىڭ اقپاراتىنشا، جۇك كولىگى تىركەمەسىندە تاسىمالدانعان مەتال بولشەكتەر تەمىر جول بويىنا شاشىلىپ كەتكەن. پوليتسيا جولاۋشىلاردى ەۆاكۋاتسيالاۋدى ۇيىمداستىرىپ، ولاردى اپات ورنىنان تاسىمالداۋ ءۇشىن اۆتوبۋستار شاقىردى.
بۇعان دەيىن گۆاتەمالادا جولاۋشىلار اۆتوبۋسى كوپىردەن قۇلاپ، كەم دەگەندە 51 ادام قازا تاپقانىن جازعان بولاتىنبىز. ال كەشە اريزونا اۋەجايىندا ەكى ۇشاق سوقتىعىسىپ، ءبىر ادام قازا تاپتى.
اۆتور
زارينا تۋعانبايەۆا
