گەرمانيا سيريالىقتارعا كومەك رەتىندە 300 ميلليون ەۋرو ءبولۋدى ۋادە ەتتى
استانا. KAZINFORM - گەرمانيا ب ۇ ۇ جانە باسقا دا ءبىرقاتار ۇيىم ارقىلى سيريالىقتارعا كومەك رەتىندە تاعى 300 ميلليون ەۋرو ءبولۋدى ۋادە ەتتى.
بۇل تۋرالى گەرمانيانىڭ سىرتقى ىستەر ءمينيسترى اننالەنا بەربوك دۇيسەنبى كۇنى بريۋسسەلدە ە و باسشىلىعىمەن وتەتىن دونورلىق كونفەرەنتسيا قارساڭىندا مالىمدەدى، دەپ حابارلايدى Kazinform اگەنتتىگىنىڭ ءتىلشىسى.
Reuters اگەنتتىگىنىڭ مالىمەتىنشە، بولىنگەن قاراجاتتىڭ جارتىسىنان استامى سيريا حالقىن قولداۋعا باعىتتالادى، الايدا ولاردى ءبولۋ ەلدىڭ وتپەلى ۇكىمەتىنىڭ قاتىسۋىنسىز جۇزەگە اسىرىلاتىنىن بەربوك اتاپ ءوتتى.
گەرمانيا سىرتقى ىستەر مينيسترلىگىنىڭ مالىمدەمەسىنە سايكەس، بۇل قاراجات ازىق-تۇلىكپەن قامتاماسىز ەتۋگە، مەديتسينالىق قىزمەتتەر كورسەتۋگە، شۇعىل باسپانا ۇسىنۋعا، سونداي-اق حالىقتىڭ ەڭ وسال توپتارىن قورعاۋ شارالارىنا جۇمسالادى.
سونداي-اق، كومەك يوردانيا، ليۆان، يراك جانە تۇركيادا تۇراتىن سيريالىق بوسقىندار مەن ولاردى قابىلداۋشى قاۋىمداستىقتارعا كورسەتىلەتىنىن بەربوك قوسا ايتتى.
ول تاعى دا سيريانىڭ بەيبىت بولاشاعىن قامتاماسىز ەتۋ ءۇشىن ينكليۋزيۆتى ساياسي ۇدەرىستىڭ ماڭىزدىلىعىن اتاپ ءوتتى.
- ەۋروپالىقتار رەتىندە ءبىز سيريا حالقىن قورعاۋدا بىرگەمىز، ەركىن جانە بەيبىت سيريا ءۇشىن كۇرەسەمىز، - دەپ مالىمدەدى مينيستر.
سونداي-اق، ول وتپەلى ۇكىمەتتى الاۆيت اۋىلدارىندا جۇزدەگەن بەيبىت تۇرعىننىڭ ءولتىرىلۋىن تەرگەۋگە جانە كىنالىلەردى جاۋاپقا تارتۋعا شاقىردى.
ەسكە سالا كەتسەك، 6-9-ناۋرىز ارالىعىندا سيريانىڭ جاعالاۋىنداعى تارتۋس جانە لاتاكيا پروۆينتسيالارىندا بيلىكتەن تايدىرىلعان پرەزيدەنت باشار اسادتىڭ جاقتاستارى مەن ەلدىڭ جاڭا بيلىگى اراسىندا قاقتىعىستار بولدى. وعان اساد جاقتاستارىنىڭ سيريانىڭ قوعامدىق قاۋىپسىزدىك كۇشتەرىنە شابۋىل جاساۋى سەبەپ بولعان. مونيتورينگتىك توپتاردىڭ ءبىرىنىڭ مالىمەتىنشە، زورلىق-زومبىلىق تولقىنى سالدارىنان 1000نان استام ادام قازا تاپقان.
بۇل شابۋىل بيلىكتەن تايدىرىلعان پرەزيدەنت باشار اساد تيەسىلى بولعان الاۆيت قاۋىمداستىعىنىڭ وكىلدەرىن ولتىرۋگە اكەلدى. الاۆيتتەر - ءداستۇرلى تۇردە سيريانىڭ جاعالاۋ ايماقتارىندا قونىستانعان جانە ەلدىڭ بيلەۋشى ەليتاسىندا ماڭىزدى ورىن العان ءدىني ازشىلىق توبى.
وتكەن اپتادا سيريا باسشىسى بەس جىلعا ارنالعان ۋاقىتشا كونستيتۋتسياعا قول قويدى. ول وتپەلى كەزەڭدە بارلىق سيريالىقتاردىڭ قۇقىقتارىن قورعاۋعا ۋادە بەرەدى.
