گەرمانيا قازاقستاندا جىلىنا 30 مىڭ توننا قوي ەتىن وڭدەيتىن زاۋىت سالۋى مۇمكىن
استانا. KAZINFORM - دۇنيەجۇزىلىك «GFFA» ازىق-تۇلىك جانە اۋىل شارۋاشىلىعى جونىندەگى فورۋمعا قاتىسۋ ءۇشىن گەرمانيا استاناسى بەرلينگە بارعان اۋىل شارۋاشىلىعى ۆيتسە-ءمينيسترى ەربول تاسجۋرەكوۆ باستاعان قازاقستاندىق دەلەگاتسيا «جاسىل اپتا» كورمەسىنىڭ رەسمي اشىلۋىنا قاتىستى.
بۇل تۋرالى ق ر اۋىل شارۋاشىلىعى مينيسترلىگىنىڭ باسپا ءسوز قىزمەتىنەن ءمالىم بولدى.
- 2024-جىلعى حالىقارالىق «جاسىل اپتانىڭ» اۋقىمدى ىسكەرلىك باعدارلاماسى جەتەكشى وندىرۋشىلەردىڭ وزىق تاسىلدەرىمەن جانە جەتىستىكتەرىمەن تانىسۋعا جانە بۇكىل الەمنىڭ اۋىل شارۋاشىلىعى سالاسىنىڭ كوشباسشىلارىمەن بايلانىس ورناتۋعا تاماشا مۇمكىندىك بەرەدى، - دەپ اتاپ ءوتتى ەربول تاسجۇرەكوۆ نەمىس جانە قازاقستاندىق جۋرناليستەرگە بەرگەن سۇحباتىندا.
قازاقستان العاش رەت 2018-جىلى «جاسىل اپتادا» ءوزىنىڭ پاۆيلونىن اشىپ، 10 وتاندىق اۋىل شارۋاشىلىعى ءونىمىن وندىرۋشىلەردىڭ ءونىمىن الەمگە تانىستىردى. بيىل كورمەگە 20 دان استام قازاقستاندىق كومپانيا قاتىسۋدا. ەكسپوزيتسيادا ەت ونىمدەرى، بيە مەن تۇيەنىڭ قۇرعاق ءسۇتى، ۇن، وسىمدىك مايلارى، كونديتەرلىك ونىمدەر، بال، جەنت، جەمىس شىرىندارى بار.
گەرمانيا - قازاقستاننىڭ، اسىرەسە ەكونوميكا مەن اۋىل شارۋاشىلىعى سالاسىنداعى ماڭىزدى سەرىكتەسى. 2023-جىلدىڭ قاڭتار-قاراشا ايلارىندا ەكى ەل اراسىنداعى اۋىل شارۋاشىلىعى ونىمدەرىنىڭ تاۋار اينالىمى 113,7 ميلليون دوللاردى قۇرادى. بۇل 2022-جىلدىڭ سايكەس كەزەڭىنەن %18,3 عا ارتىق. وسى ۋاقىت ىشىندە قازاقستاننان گەرمانياعا 26,2 ميلليون ا ق ش دوللاردىڭ اۋىل شارۋاشىلىعى تاۋارلارى ەكسپورتتالدى. سونىمەن قاتار، نەگىزگى جەتكىزىلىم بالىق فيلەسى مەن باسقا دا بالىق ونىمدەرى بولىپ كەلەدى (16,9 ميلليون ا ق ش دوللارى؛ 2,2 مىڭ توننا). قازاقستان ءوز كەزەگىندە گەرمانيادان تەك شوكولاد جانە قۇرامىندا كاكاو بار باسقا دا دايىن ونىمدەردى 24 ميلليون ا ق ش دوللارعا يمپورتتادى (2023-جىلدىڭ قاڭتار-قاراشا ايلارىندا گەرمانيادان قازاقستانعا جالپى يمپورت 87,5 ميلليون ا ق ش دوللاردى قۇرادى).
ەربول تاسجۋرەكوۆتىڭ ايتۋىنشا، گەرمانيالىق ينۆەستورلاردىڭ قاتىسۋىمەن CLAAS جانە HORSCH كومپانيالارىنىڭ اۋىل شارۋاشىلىعى تەحنيكالارىن قۇراستىرۋ جوباسى ىسكە اسىرىلعان. قازىرگى ۋاقىتتا Baumann GmbH كومپانياسىنىڭ قۋاتى جىلىنا 30 مىڭ توننا قوي ەتىن وڭدەيتىن زاۋىت سالۋ تۋرالى كەلىسسوزدەر جۇرگىزىلۋدە.
- گەرمانياداعى دۇكەن سورەلەرىندەگى وتاندىق تاۋارلاردىڭ اسسورتيمەنتى جىل سايىن كەڭەيە تۇسەتىنىنە سەنىمدىمىن. قازاقستاننىڭ بۇل كورمەگە قاتىسۋى داستۇرگە اينالدى جانە ىسكەرلىك بايلانىستار ورناتۋعا، تاجىريبە الماسۋعا جاڭا بىرلەسكەن جوبالاردى ىسكە اسىرۋعا ىقپال ەتەتىن ماڭىزدى وقيعا بولىپ تابىلادى، - دەپ اتاپ ءوتتى ۆيتسە-مينيستر سۇحبات بارىسىندا.
