ۇرلانعان تاعى ءبىر تريلليون تەڭگە قازاقستانعا قايتارىلادى
استانا. KAZINFORM - باس پروكۋراتۋرا جانىنداعى اكتيۆتەردى قايتارۋ كوميتەتى اكتيۆتەردى ەرىكتى تۇردە قايتارۋ تۋرالى 50 دەن استام كەلىسىم جاساستى.
بۇل تۋرالى Kazinform اگەنتتىگىنە ەكسكليۋزيۆتى سۇحبات بەرگەن اتالعان كوميتەت ءتوراعاسى نۇرداۋلەت سۇيىندىكوۆ ايتتى.
قازىرگى ۋاقىتقا دەيىن ارناۋلى مەملەكەتتىك قورعا شامامەن 188 ميلليارد تەڭگە ءتۇسىپ، باسقارۋشى كومپانياعا 87 ميلليارد تەڭگەنىڭ اكتيۆتەرى تابىستالدى.
- بۇگىندە ءبىز كوميسسيانىڭ ماقۇلداۋىمەن اكتيۆتەردى ەرىكتى تۇردە قايتارۋ تۋرالى 50 دەن استام كەلىسىم جاساستىق. جالپى سوماسى شامامەن 1 تريلليون تەڭگەدەن اسادى. اكتيۆتەردىڭ بەرۋگە دايىندالۋى، باعالانۋى تيىستىگى، تاۋەلسىز ساراپتاما، اۋديت جۇرگىزىلۋى قاجەتتىگى تۇسىنىكتى. بۇل اۋديت ەگەر جوعارى تابىس بولسا، وندا جوعارى تابىستىڭ ەسەبىن زەردەلەۋى ءتيىس. ياعني، اكتيۆتەردى بەرۋدىڭ ءوزى كەلىسىمشارت جاسالعان ساتتەن جۇزەگە اسىرىلمايدى، بەلگىلى ءبىر ۋاقىتتى الادى، - دەدى نۇرداۋلەت سۇيىندىكوۆ.
ونىڭ اتاپ وتۋىنشە، اكتيۆتەردى ەرىكتى تۇردە قايتارۋ قۇپتالادى.
- ەگەر سۋبەكت نيەت تانىتىپ، بىزگە كەلىسىم پروتسەدۋراسىن جۇرگىزۋ جانە ەرىكتى تۇردە قايتارۋ نەمەسە اكيۆتەر مەن مۇلىكتەردى بەرۋ تۋرالى ءوتىنىش بىلدىرسە، ءبىز ءتيىستى جۇمىس ىستەيمىز. ءبىز جۇمىس ىستەپ جاتقان زاڭعا ىلىگەتىن سۋبەكتىلەردىڭ باسىم بولىگى وسى جولمەن ءجۇردى. ەكىنشى جولى بار، ول - ماجبۇرلەپ قايتارۋ. كوميتەت ساراپتامالىق تەكسەرۋ جۇمىسىن جۇرگىزگەن كەزدە زاڭدىلىقتى نەگىزدى تۇردە كۇدىك تۋدىراتىن اكتيۆ انىقتالاتىن بولسا، وندا ءبىز سوتقا تۇسىنىكسىز بايلىققا بايلانىستى سوتقا شاعىم تۇسىرەمىز، - دەدى كوميتەت باسشىسى.
