ەرلان سايروۆ: كلەبانوۆ تارىزدىلەردىڭ مۇددەسى ءۇشىن ءسىڭىرى شىققان كەدەيلەردى قاناۋ كۇپىرلىك
پرەمەر-ءمينيستردىڭ ءبىرىنشى ورىنباسارى رومان سكليارعا دەپۋتاتتىق ساۋال جولداعان ءماجىلىس وكىلى ەرلان سايروۆ قىسى-جازى ساياجايدا تۇراتىن ادامداردى ارنايى ەسەپكە الۋدى ۇسىندى، دەپ حابارلايدى Kazinform اگەنتتىگى.
«ۇكىمەت «تاريفكە ينۆەستيسيا ايىرباس» پرينسيپىن ىسكە اسىرعاندا حالىقتىڭ قالتاسى جۇتاڭ ەكەنىن ەسكەرۋگە ءتيىس. تۇرعىن ءۇي كومەگى توقسان سايىن تولەنەدى. ءاربىر توقسانعا ورتاشا ەسەپپەن 20 مىڭ تەڭگە. ونىڭ ءوزىن ناعىز مۇقتاج ادامدار الا المايدى. ويتكەنى بۇل وتەمدى الۋ ءۇشىن مەنشىك ءۇيىڭ نەمەسە مەملەكەتتەن جالعا العان ءۇيىڭ بولۋ كەرەك. ونىڭ وزىندە ونداعان قۇجات تولتىرۋ قاجەت. ەڭ باستىسى، ءۇي-كۇيى جوق، پاتەر جالداپ جۇرگەن ونداعان مىڭ ناعىز مۇقتاج ازاماتقا مەملەكەت كومەگىنىڭ جۇرناعى دا تيمەيدى. ولار مەملەكەتتىڭ ەسەبىندە مۇلدەم جوق. تاريفتەردىڭ وسۋىنەن قينالاتىن، وتەماقىعا ءزارۋ وسى كىسىلەر. كلەبانوۆ تارىزدىلەردىڭ بيزنەسى جۇرمەي قالادى دەپ ءسىڭىرى شىققان كەدەيلەردى قاناي بەرۋ كۇپىرلىك بولادى»، - دەدى دەپۋتات.
ونىڭ پايىمىنشا، ۇكىمەت «تاريفكە ينۆەستيسيا ايىرباس» رەفورماسى كەزىندە مىنا ماسەلەلەرگە نازار اۋدارۋ كەرەك.
«تاريفتەردىڭ قىمباتتاۋىنا بايلانىستى تولەماقىنىڭ سوماسىن ارتتىرۋ قاجەت. بۇل تولەماقىنى ناعىز مۇقتاج، قالادا ءوزىنىڭ باسپاناسى جوق، پاتەر جالداپ تۇراتىن ازاماتتاردىڭ الۋىنا نورماتيۆتىك تەتىكتەر جاساۋ كەرەك. باسپاناسى جوق، پاتەر جالداپ جۇرگەن ازاماتتاردى ستاتيستيكا مالىمەتتەرىنە ەنگىزىپ، ولاردىڭ الەۋمەتتىك جاعدايىنا مونيتورينگ جاسايتىن ادىستەمە ەنگىزۋ قاجەت. بۇگىندە پاتەر جالداپ، ساياجايدا تۇرىپ جاتقان ازاماتتارعا مەملەكەتتىك الەۋمەتتىك كەپىلدەمە الاتىن جۇيە جاساۋ كەرەك. ولار - ءبىزدىڭ ازاماتتارىمىز. بۇل ازاماتتار ءبىر دە ءبىر ستاتيستيكا مالىمەتتەرىنە تىركەلمەگەن. ياعني، ول ادامدار مەملەكەتتىڭ ەسەبىندە مۇلدەم جوق. ولارعا نازار اۋدارماۋ ەرتەڭ الەۋمەتتىك، ساياسي تاۋەكەلگە اكەلۋى ىقتيمال»، - دەدى ەرلان سايروۆ.
