ەرلان قوشانوۆ ۇ ق ش ۇ پارلامەنتتىك اسسامبلەياسىنىڭ ءىس-شارالارىنا قاتىستى

ەرلان قوشانوۆ ءوز سوزىندە قازاقستاننىڭ 2024-جىلى ۇجىمدىق قاۋىپسىزدىك تۋرالى شارتى ۇيىمىندا ءتوراعالىعى كەزەڭىندەگى باسىمدىقتارى جايلى ايتتى.

«وزدەرىڭىزگە بەلگىلى، 2024-جىلدىڭ 1- قاڭتارىندا قازاقستان ۇجىمدىق قاۋىپسىزدىك تۋرالى شارتى ۇيىمىنا ءتوراعالىقتى قابىلدايدى. مينسكىدە وتكەن ۇجىمدىق قاۋىپسىزدىك كەڭەسىنىڭ قاراشاداعى سەسسياسىندا قازاقستان پرەزيدەنتى قاسىم-جومارت توقايەۆ قازاقستان ءتوراعالىعىنىڭ باسىم باعىتتارىن اتاپ ءوتتى»، - دەدى ءماجىلىس سپيكەرى.

باسىمدىقتاردىڭ قاتارىندا ۇ ق ش ۇ- نىڭ مۇددەلى ەلدەرمەن جانە قاۋىپسىزدىك سالاسىندا جۇمىس ىستەيتىن حالىقارالىق قۇرىلىمدارمەن، سونىڭ ىشىندە ب ۇ ۇ، ت م د جانە شاڭحاي ىنتىماقتاستىق ۇيىمىمەن سەرىكتەستىكتى تەرەڭدەتۋ ماسەلەلەرى بار. اسكەري كادرلاردى دايارلاۋ جۇيەسىن، ۇيىمنىڭ اسكەري-عىلىمي جانە بىتىمگەرشىلىك الەۋەتىن دامىتۋ بولىگىندە نورماتيۆتىك-قۇقىقتىق بازانى جەتىلدىرۋدىڭ ماڭىزى زور.

سونداي-اق قارۋ-جاراقتىڭ، وق-دارىلەردىڭ، ەسىرتكىنىڭ زاڭسىز اينالىمىنا قارسى بىرلەسكەن جۇمىستى كۇشەيتۋ جوسپارلانىپ وتىر. ۇ ق ش ۇ جاۋاپكەرشىلىگى ايماعىنداعى توتەنشە جاعدايلاردىڭ، كيبەرقىلمىستىڭ الدىن الۋ جانە ولاردىڭ سالدارىن جويۋ جونىندەگى پراكتيكالىق ىنتىماقتاستىقتى دامىتۋعا ەرەكشە نازار اۋدارىلادى.

ەرلان قوشانوۆ ۇ ق ش ۇ پارلامەنتتىك اسسامبلەياسىنىڭ ۇيىمعا مۇشە مەملەكەتتەردىڭ مۇددەلەرىن ەسكەرە وتىرىپ، ۇلتتىق زاڭناماسىن دامىتۋ مەن ۇيلەستىرۋگە قوسقان ۇلەسىن اتاپ ءوتتى. سونداي-اق ءماجىلىس ءتوراعاسى قاتىسۋشى ەلدەردىڭ پارلامەنتتەرى اراسىنداعى ءتيىمدى ىنتىماقتاستىقتىڭ ايقىن مىسالى رەتىندە پارلامەنتتىك اسسامبلەيانىڭ تۇراقتى كوميسسيالارىنىڭ قىزمەتىنە توقتالدى.

«قازاقستاننىڭ ءتوراعالىعى كەزەڭىندە بىرلەسكەن كۇش-جىگەرمەن جانە ۇ ق ش ۇ مەن ونىڭ پارلامەنتتىك اسسامبلەياسىنىڭ جۇمىس ورگاندارىنىڭ ساراپتامالىق قولداۋىنىڭ ارقاسىندا ءبىز ۇجىمدىق قاۋىپسىزدىك جۇيەسىن نىعايتۋ ىسىندە جەمىستى جۇمىس ىستەيتىنىمىزگە سەنىمدىمىن»، - دەدى ەرلان قوشانوۆ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى