ەرلان قارين: مەملەكەت جازۋشىلار وداعىنىڭ جۇمىسىنا ەرەكشە ءمان بەرەدى
استانا. KAZINFORM - مەملەكەتتىك كەڭەسشى ەرلان قارين قازاقستان جازۋشىلار وداعىنىڭ قۇرىلعانىنا 90 جىل تولعانىنا وراي ۇيىمداستىرىلعان ءىس- شاراعا قاتىستى.
ەرلان قارين سالتاناتتى جيىندا مەملەكەت باسشىسىنىڭ قۇتتىقتاۋ حاتىن وقىپ بەردى، سونداي- اق قازاق رۋحانياتىنىڭ قاراشاڭىراعى جونىندەگى وي- پىكىرىن ورتاعا سالدى.
- مەملەكەت ادەبيەتتى دامىتۋ ىسىنە جانە ادەبي ورتانىڭ جالپى احۋالىنا ايرىقشا نازار اۋدارادى. جازۋشىلار وداعىنىڭ جۇمىسىنا ەرەكشە ءمان بەرەدى. پرەزيدەنتىمىز قاسىم- جومارت توقايەۆتىڭ قالامگەرلەرگە دەگەن ىقىلاسى مەن قۇرمەتىن بارشاڭىز جاقسى بىلەسىزدەر. ول مەملەكەتتىڭ باسشىسى عانا ەمەس، جازۋشىنىڭ پەرزەنتى رەتىندە دە ءتول ادەبيەتىمىزگە بەي- جاي قارامايدى. سوڭعى جىلدارى اتقارىلعان اۋقىمدى جۇمىستار- وسىنىڭ ايقىن كورىنىسى، - دەدى ەرلان قارين.
مەملەكەتتىك كەڭەسشى جيىن بارىسىندا ءسوز سويلەپ، رۋحانيات پەن مادەنيەت سالاسىنداعى ءبىرقاتار ماسەلەگە توقتالدى. سونداي- اق، ادەبيەتتىڭ اعارتۋ ىسىندەگى رولىنە نازار اۋداردى.
- حالىق اعارتۋ ءىسىنىڭ جانە ۇرپاق تاربيەسىنىڭ ەڭ باستى كىلتى - ادەبيەت. شىن مانىندە، ۇلت ساپاسىن ارتتىرۋعا ادامگەرشىلىك قۇندىلىقتاردى دارىپتەيتىن شىعارمالاردىڭ ىقپالى وتە زور، - دەدى ەرلان قارين.
