ەركىن تۇقىموۆ: قىتايدا ءبىزدى زەرتتەيتىن 18 ورتالىق بار
استانا. KAZINFORM - قازاقستانعا قىتايتانۋعا ماماندانعان كاسىبي ساراپتامالىق ورتالىقتار قاجەت. پرەزيدەنت جانىنداعى قازاقستان ستراتەگيالىق زەرتتەۋلەر ينستيتۋتىنىڭ ديرەكتورى ەركىن تۇقىموۆ «ق س ز ي: Gylym. Pikir. Sayasat» ۇلتتىق ساراپتاما الاڭىندا وسىنداي وي ايتتى.
ساراپتاما الاڭىنا جينالعاندار بۇل جولى ەلدىڭ كۇن ءتارتىبىن قالىپتاستىرۋداعى تالداۋ ورتالىقتارىنىڭ ءرولىن تالقىلاعان بولاتىن.
- جۋىقتا ءبىز قىتايعا باردىق. تەك قازاقستان مەن ورتالىق ازيانى زەرتتەۋمەن اينالىساتىن 18 ورتالىق بار ەكەنىن وزدەرى ايتىپ وتىر. شياننىڭ وزىندە عانا ەكى ورتالىق، بەيجىڭدە ءۇش ورتالىق بار. ال بىزدە قىتايدى زەرتتەۋگە عانا ماماندانعان نەشە ورتالىق بار؟ پروبلەما مامان نەمەسە قارجى تاپشىلىعىندا ەمەس، ولار بار. تانىمال قىتايتانۋشىلار دا بار. ءبىراق ولاردىڭ ەشقايسىسى ازىرگە تولىققاندى ساراپتاما ورتالىعى نەمەسە مەكتەپ بولىپ قالىپتاسا العان جوق. بۇل ماسەلە باسقا باعىتتارعا دا ورتاق، - دەدى ساراپشى.
ەركىن تۇقىموۆ ەلدەگى ساراپتاما ورتالىقتارىنىڭ ناقتى سانىن دا ەشكىم بىلمەيتىنىن ايتادى.
- مەنىڭ ارىپتەستەرىم قازاقستاندا 43 ساراپتاما ورتالىعى بار دەپ ەسەپتەپ شىعاردى. بۇل سان ناقتى ەكەنىنىنە سەنىمدى ەمەسپىن. بىزدە ناقتى دەرەك جوق. سانداردىڭ ساراپتاماسى دا ماڭىزدى. جالپى بىزدەگى ورتالىقتار 9 ءىرى باعىتتى ۇستانادى. ءبىراق زەرتتەۋلەرى ءتۇرلى تاقىرىپتاردى قامتيدى. كەشەندى زەرتتەۋدى دە، الەۋمەتتىك- ساياسي، الەۋمەتتىك-ەكونوميكالىق، حالىقارالىق، وڭىرلىك زەرتتەۋلەردى، قاۋىپسىزدىك، جاستار ماسەلەسىن دە قاتار الىپ جۇرە بەرەدى، - دەيدى ق س ز ي باسشىسى.
اۆتور
ەسىمجان ناقتىباي
