رەجەپ تايىپ ەردوعان پرەزيدەنتكە تۇركيالىق ەلەكتروموبيل سىيلادى
قاسىم- جومارت توقايەۆ تۇركى مەملەكەتتەرى ۇيىمىنىڭ 10- سامميتىنە قاتىسقان رەجەپ تايىپ ەردوعانعا ءىلتيپات ءبىلدىرىپ، ەلوردا اۋەجايىنان شىعارىپ سالدى، دەپ حابارلايدى Kazinform اقوردانىڭ باسپا ءسوز قىزمەتىنە سىلتەمە جاساپ.
ەجەپ تايىپ ەردوعان ءوزارا قۇرمەتتىڭ بەلگىسى رەتىندە قاسىم- جومارت توقايەۆقا تۇركيادا شىعارىلعان TOGG ەلەكتروموبيلىن سىيعا تارتتى. سونداي- اق مەملەكەت باسشىسىنا جاڭا ەلەكتروكاردى ءوزى تانىستىردى.
قاسىم- جومارت توقايەۆ رەجەپ تايىپ ەردوعانعا العىس ايتىپ، ارىپتەسىن TOGG ەلەكتروموبيلىنىڭ ءوندىرىسىن تابىستى ىسكە قوسۋىمەن قۇتتىقتادى.
Togg T10X - تۇركيا ەلەكتروموبيل ءوندىرىسىنىڭ تۇڭعىش ءونىمى. تەحنيكالىق سيپاتتاماسىندا يننوۆاتسيالىق كولىك جىلدامدىعىن 4,8 سەكۋند ىشىندە 100 شاقىرىم/ساعاتقا دەيىن ۇدەتە الاتىنى ايتىلعان.
اتالمىش كولىك بۋرسا قالاسىنداعى زاۋىتتا مەنشىكتى مودۋلدىك پلاتفورما نەگىزىندە قۇراستىرىلادى. ياعني، كەلەشەكتە وسى مودۋلدىك پلاتفورما نەگىزىندە كولىكتىڭ تەحنيكالىق سيپاتتارى تەحنولوگيا مەن زامان تالابىنا ساي جاڭارتىلىپ، جەتىلدىرىلىپ وتىرادى دەگەن ءسوز.
Togg T10X اككۋمولياتورى 28 مينۋتتىڭ ىشىندە %60 قۋات جينايدى. ءوندىرىس يەلەرى 2030 -جىلعا قاراي اتالمىش كولىكتىڭ 1 ميلليون داناسىن 5 سەگمەنت بويىنشا شىعارۋدى جوسپارلاپ وتىر.
تۇركيا سايتتارىنداعى مالىمەتتەرگە سۇيەنسەك، بەس ەسىكتى كروسسوۆەرگە T10X يندەكسىنىڭ بەرىلۋى دە تەگىن ەمەس. «ت» تاڭباسى «Türkiye» ءسوزىنىڭ باسقى ءارىبى بولسا، 10 سانى «س» سەگمەنتىنىڭ رەتتىك ءنومىرىن بىلدىرەدى. ال «X» تاڭباسى كولىكتىڭ شاناعى كروسسوۆەر ەكەنىنەن حابار بەرەدى.
جالپى Togg برەندىنىڭ تۇڭعىش ەلەكتروموبيلى 2022 -جىلدىڭ كۇزىنەن بەرى قۇراستىرىلىپ كەلەدى. بۇعان دەيىن تۇركيا اۆتوموبيل يندۋسترياسىنىڭ جاڭا ماقتانىشى ب ا ءا پرەزيدەتىنە، قاتار امىرىنە، ساۋد ارابياسىنىڭ حانزاداسىنا، ازەربايجان جانە وزبەكستان پرەزيدەنتتەرىنە، تۇرىكمەنستان باسشىلىعىنا سىيعا تارتىلعان.
ەسكە سالايىق، بۇگىن استانادا تۇركى مەملەكەتتەرى ۇيىمىنىڭ X ءسامميتى ءوتىپ جاتىر.
«تۇركى ءداۋىرى» ۇرانىمەن وتكەن جيىنعا تۇركيا، ازەربايجان، وزبەكستان، قىرعىزستان پرەزيدەنتتەرى ۇيىمعا مۇشە مەملەكەت باسشىلارى رەتىندە، ماجارستان پرەمەر- ءمينيسترى مەن تۇرىكمەنستان باسشىسى باقىلاۋشى ەلدىڭ باسشىلارى رەتىندە قاتىستى.
