پەرۋدىڭ بۇرىنعى پرەزيدەنتى مەن ونىڭ ايەلى 15جىلعا باس بوستاندىعىنان ايىرىلدى
استانا. KAZINFORM - پەرۋ سوتى ەكى سايلاۋ ناۋقانىن قارجىلاندىرۋ ءۇشىن برازيليالىق Odebrecht قۇرىلىس كومپانياسى مەن ۆەنەسۋەلا ۇكىمەتىنەن تولەمدەردى قابىلداعانى ءۇشىن بۇرىنعى پرەزيدەنت وليانا ۋمالا مەن ايەلى نادين ەرەديانى كىنالى دەپ تاپتى.
ولار سىبايلاس جەمقورلىق ءىسى بويىنشا 15 جىلعا باس بوستاندىعىنان ايىرىلدى.
ۋمالا ۇكىم شىعارىلعاننان كەيىن سوت زالىندا قاماۋعا الىندى. سۋديا سوت وتىرىسىنا قاتىسپاعان ونىڭ ايەلىن دە قاماۋعا الۋدى بۇيىردى. كەيىنىرەك ونىڭ ليماداعى برازيليا ەلشىلىگىنەن ساياسي باسپانا سۇراعانى بەلگىلى بولدى.
2011-2016 -جىلدارى پرەزيدەنت قىزمەتىن اتقارعان ۋمالا 2022 -جىلى Odebrecht توڭىرەگىندەگى ءىرى جەمقورلىق جانجالىن تەرگەۋ اياسىندا سوت الدىندا جاۋاپ بەرگەن پەرۋدىڭ العاشقى باسشىسى بولدى. بيلىكتىڭ مالىمدەۋىنشە، بۇعان سونداي-اق باسقا بۇرىنعى پرەزيدەنتتەردىڭ دە قاتىسى بار.
1985-1990 جانە 2006-2011 -جىلدار ارالىعىندا مەملەكەت باسشىسى بولعان الان گارسيا 2019 -جىلى پوليتسيا ونى تۇتقىنداۋعا كەلگەندە ءوز-وزىنە قول جۇمسادى.
الەحاندرو تولەدو (2001-2006 -جىلدارداعى پرەزيدەنت) وتكەن جىلى ميلليونداعان دوللار پارا العانى ءۇشىن 20 جىلدان اسا مەرزىمگە باس بوستاندىعىنان ايىرىلعان.
سونداي-اق بۇل قىزمەتتى 2016-2018 -جىلدارى اتقارعان پەدرو پابلو كۋچينسكيگە قاتىستى تەرگەۋ امالدارى جالعاسىپ جاتىر.
بۇعان دەيىن ناۋرىز ايىندا پەرۋ پرەزيدەنتى جالپىحالىقتىق سايلاۋ كۇنىن بەلگىلەگەنىن حابارلاعان ەدىك.
اۆتور
زارينا تۋعانبايەۆا
